ഇന്ത്യയുമായുള്ള ശക്തമായ ബന്ധം ബലികഴിച്ചത് പാകിസ്താനിലെ കുടുംബ ബിസിനസിന് വേണ്ടി ; ട്രംപിനെതിരെ മുൻ ദേശീയ സുരക്ഷാ ഉപദേഷ്ടാവ് രംഗത്ത്

ന്യൂയോർക്ക്> യുഎസ് പ്രസിഡണ്ട് ഡൊണാൾഡ് ട്രംപിനെതിരെ രൂക്ഷ വിമർശനവുമായി മുൻ ദേശീയ സുരക്ഷാ ഉപദേഷ്ടാവ് ജേക്ക് സള്ളിവൻ. ഇന്ത്യയുമായുള്ള ശക്തമായ ബന്ധം ട്രംപ് പാകിസ്താനിലെ തന്റെ കുടുംബ ബിസിനസിന് വേണ്ടി ബലി കഴിക്കുകയായിരുന്നു എന്നാണ് ജേക്ക് സള്ളിവൻ വ്യക്തമാക്കിയത്. തന്റെ കുടുംബത്തിന്റെ ക്രിപ്‌റ്റോ ബിസിനസിനായി ഇന്ത്യ പോലുള്ള ഒരു തന്ത്രപരമായ പങ്കാളിയെ ട്രംപ് ഇല്ലാതാക്കി എന്നും സള്ളിവൻ കുറ്റപ്പെടുത്തി.

ഇന്ത്യയുമായുള്ള ബന്ധം ത്യജിക്കാനുള്ള നീക്കം യുഎസിന് “വലിയ തന്ത്രപരമായ ദോഷം” ആണെന്ന് ജോ ബൈഡൻ ഭരണകൂടത്തിലെ മുൻ എൻഎസ്എ ആയിരുന്ന ജേക്ക് സള്ളിവൻ വ്യക്തമാക്കി. മെയ്ഡാസ് ടച്ച് യൂട്യൂബ് ചാനലിന് നൽകിയ അഭിമുഖത്തിൽ ആയിരുന്നു അദ്ദേഹത്തിന്റെ ഈ പരാമർശങ്ങൾ. ലോകത്തിലെ ഏറ്റവും വലിയ ജനാധിപത്യ രാഷ്ട്രമായ ഇന്ത്യയുമായുള്ള ബന്ധം കെട്ടിപ്പടുക്കാൻ പതിറ്റാണ്ടുകളായി യുഎസ് ഉഭയകക്ഷി അടിസ്ഥാനത്തിൽ പ്രവർത്തിച്ചിട്ടുണ്ടെന്നും അദ്ദേഹം പറഞ്ഞു. സാങ്കേതികവിദ്യ, കഴിവുകൾ, സാമ്പത്തിക ശാസ്ത്രം തുടങ്ങി നിരവധി വിഷയങ്ങളിലും ചൈനയിൽ നിന്നുള്ള തന്ത്രപരമായ ഭീഷണിയെ നേരിടുന്നതിലും ഇന്ത്യയുമായി യോജിച്ച് പ്രവർത്തിക്കേണ്ടത് അത്യാവശ്യമായിരുന്നു എന്നും ജേക്ക് സള്ളിവൻ അഭിപ്രായപ്പെട്ടു.

ക്രിപ്‌റ്റോ വ്യവസായത്തിൽ നിക്ഷേപവും നവീകരണവും പ്രോത്സാഹിപ്പിക്കുന്നതിനായി ഏപ്രിൽ മാസത്തിന്റെ തുടക്കത്തിലാണ് ട്രംപിന്റെ WLF പാകിസ്താൻ ക്രിപ്‌റ്റോ കൗൺസിലുമായി (PCC) നിരവധി കരാറുകളിൽ ഔദ്യോഗികമായി ഒപ്പുവച്ചത്. ക്രിപ്‌റ്റോകറൻസി ആപ്ലിക്കേഷനുകൾ വികസിപ്പിക്കുന്നതിനും ബ്ലോക്ക്‌ചെയിൻ ദത്തെടുക്കൽ ശക്തിപ്പെടുത്തുന്നതിനും ട്രംപിന്റെ പിന്തുണയോടെ പ്രവർത്തിക്കുന്ന ഒരു വികേന്ദ്രീകൃത ധനകാര്യ പ്ലാറ്റ്‌ഫോമാണ് WLF. സ്ഥാപനത്തിന്റെ 60% ഓഹരികളും ട്രംപിന്റെ കുടുംബത്തിന് സ്വന്തമാണ്.