Kerala Times Bureau
KFC Loan> ബിസിനസ് വളര്ത്താന് ആഗ്രഹിച്ചിട്ടും മൂലധനം ഇല്ലാത്തതാണോ നിങ്ങളുടെ പ്രശ്നം. എന്നാല് കേരള ഫിനാന്ഷ്യല് കോര്പ്പറേഷന്റെ (കെഎഫ്സി) പുതിയ നീക്കം നിങ്ങള്ക്ക് സഹായരമായേക്കും. സംസ്ഥാനത്തിന്റെ വ്യാവസായിക വളര്ച്ചയെ പിന്തുണയ്ക്കുകയാണ് പദ്ധതിയുടെ ലക്ഷ്യം.
സൂക്ഷ്മ, ചെറുകിട, ഇടത്തരം സംരംഭങ്ങള് (എംഎസ്എംഇകള്), സ്റ്റാര്ട്ടപ്പുകള്, മറ്റ് വിവിധ മേഖലകള് എന്നിവയ്ക്ക് പ്രധാന്യം നല്കുന്നതാണ് പദ്ധതി. പ്രധാന സവിശേഷതകള്, ആനുകൂല്യങ്ങള്, യോഗ്യത, അപേക്ഷാ പ്രക്രിയ എന്നിവ അറിയാം….
കെഎഫ്സി മെഷിനറി ലോണ്
എംഎസ്എംഇകള്ക്കുള്ള കെഎഫ്സി മെഷിനറി ലോണിനെ പറ്റിയാണ് പറയുന്നത്. പുതിയ യന്ത്രങ്ങളും, ഉപകരണങ്ങളും വാങ്ങാനും, പ്രവര്ത്തനങ്ങള് നവീകരിക്കാനും, വികസിപ്പിക്കാനും ഈ പദ്ധതി വഴി സഹായം ലഭിക്കും. ഉപയോക്താക്കള്ക്ക് 5 കോടി രൂപ വരെ സഹായത്തിന് വഴിയുണ്ട്. യന്ത്രസാമഗ്രികളുടെ ചെലവിന്റെ 80% വരെ പരിരക്ഷ ലഭിക്കും. ഈ വായ്പയ്ക്ക് നിങ്ങള് ഈട് നല്കേണ്ട ആവശ്യമില്ല. അതായത് ഇത് കൊളാറ്ററല് ഫ്രീ ആണ്. വായ്പകള്ക്ക് ക്രെഡിറ്റ് ഗ്യാരണ്ടി ഫണ്ട് ട്രസ്റ്റ് ഫോര് മൈക്രോ ആന്ഡ് സ്മോള് എന്റര്പ്രൈസസ് (സിജിടിഎംഎസ്ഇ) പിന്തുണ നല്കും. 1 വര്ഷം വരെ മൊറട്ടോറിയവും ലഭ്യമാണ്. 7 വര്ഷം വരെയാണ് തിരിച്ചടവ് കാലാവധി. മുഖ്യമന്ത്രിയുടെ സംരംഭകത്വ വികസന പരിപാടി (CMEDP) പ്രകാരം യോഗ്യത നേടുന്ന യൂണിറ്റുകള്ക്ക് 5% മുതല് പലിശ നിരക്കില് വായ്പകള് കിട്ടും.
പദ്ധതിയുടെ നേട്ടങ്ങള്
സാങ്കേതികവിദ്യ, യന്ത്രസാമഗ്രികള് എന്നിവ വാങ്ങാനും, നവീകരിക്കാനും ലക്ഷ്യമിടുന്നവരുടെ സാമ്പത്തിക ഭാരം കുറയും. ഈട് ആവശ്യമില്ല. ഉല്പാദനക്ഷമതയും, കാര്യക്ഷമതയും വര്ദ്ധിപ്പിക്കാന് ബിസിനസുകളെ പ്രാപ്തമാക്കും. സുതാര്യത വര്ധിപ്പിച്ചു കൊണ്ട് കെഎഫ്സി നേരിട്ട് വിതരണക്കാരന് പണം നല്കുന്നു.
പദ്ധതിക്ക് ആവശ്യമായ യോഗ്യത
എന്റര്പ്രൈസ് എംഎസ്എംഇ ഉദ്യം രജിസ്ട്രേഷന്, ജിഎസ്ടി എന്നിവ നേടിയിരിക്കണം. കുറഞ്ഞത് മൂന്ന് വര്ഷമെങ്കിലും തുടര്ച്ചയായ പ്രവര്ത്തന ട്രാക്ക് ഉണ്ടായിരിക്കണം. കഴിഞ്ഞ രണ്ട് സാമ്പത്തിക വര്ഷങ്ങളില് യൂണിറ്റ് ലാഭം റിപ്പോര്ട്ട് ചെയ്യുകയും, പോസിറ്റീവ് നെറ്റ് വര്ത്ത് നിലനിര്ത്തുകയും ചെയ്തിരിക്കണം. പ്രൊമോട്ടര്ക്ക് കുറഞ്ഞത് 700 സിബില് സ്കോര് വേണം. എന്റര്പ്രൈസസിന്റെ സിബില് റേറ്റിംഗ് 1 നും 5 നും ഇടയിലായിരിക്കണം. മുന്നിര വിതരണക്കാരില് നിന്നുള്ള പുതിയ യന്ത്രങ്ങള്ക്ക് മാത്രമേ ധനസഹായം ലഭിക്കൂ. ഉപയോഗിച്ച ഉപകരണങ്ങള്ക്ക് വായ്പ ലഭിക്കില്ല.
അപേക്ഷാ പ്രക്രിയ
- കെഎഫ്സിയുടെ ഔദ്യോഗിക വെബ്സൈറ്റില് (www.kfc.org) അപേക്ഷ സമര്പ്പിക്കണം.
- തുടര്ന്ന് അധികൃതര് ആവശ്യപ്പെടുന്ന രേഖകള് നല്കണം.
- പ്രോജക്റ്റ് റിപ്പോര്ട്ടുകള്, സാമ്പത്തിക പ്രസ്താവനകള്, പ്രൊമോട്ടര് വിശദാംശങ്ങള്, മറ്റ് പ്രസക്തമായ രേഖകള് എന്നിവ ഇതില് ഉള്പ്പെടാം.
- വിവരങ്ങള് പരിശോധിച്ച ശേഷം അധികൃതര് നിങ്ങളുടെ ബിസിനസ് കേന്ദ്രം സന്ദര്ശിച്ച് വിലയിരുത്തും.
- ചില പദ്ധതികള്ക്ക്, പ്രത്യേകിച്ച് സിഎംഇഡിപിക്ക് കീഴിലുള്ള ആദ്യ സംരംഭകര്ക്ക് പരിശീലനം നല്കിയേക്കാം.
- എല്ലാ പരിശോധനകളും കഴിഞ്ഞാല് വായ്പ അനുവദിക്കും. വായ്പ അനുവദിക്കുന്നതിനുള്ള തത്വത്തിലുള്ള അനുമതി വെറും 7 ദിവസത്തില് നല്കും.
- കൂടുതല് വിവരങ്ങള്ക്ക് 1800 425 8590 എന്ന നമ്പറില് കെഎഫ്സിയുടെ ഹെല്പ്പ് ഡെസ്കുമായി ബന്ധപ്പെടാം.
