Kerala Times Bureau
UPI News-ThumpPay> കണ്ടാൽ ഒരു സാധാരണ ബയോമെട്രിക് അറ്റൻഡൻസ് പഞ്ചിംഗ് മെഷീൻ. പക്ഷെ ആളൊരു വിപ്ലവമാണ്. ഇന്ത്യയുടെ ഡിജിറ്റല് ആവാസവ്യവസ്ഥ അതിവേഗം പരിണാമത്തിന് വിധേയമായി കൊണ്ടിരിക്കുകയാണ്. ആഗോളതലത്തില് തന്നെ ഇന്ത്യയുടെ യുപിഐയുടെ സ്വീകാര്യത വര്ധിച്ചു വരുന്നു. യുഎസിഐയില് തന്നെ പുതിയത് എന്തെങ്കിലും അവതരിപ്പിക്കാനുള്ള പരിശ്രമം മേല്നോട്ട ചുമതലയുള്ള എന്പിസിഐയും തുടരുന്നു. രാജ്യത്തെ ഡിജിറ്റല് പരിവര്ത്തനത്തിന് യുപിഐ നല്കുന്ന സംഭാവന വളരെ വലുതാണ്. ക്യാഷ്ലെസ് സമ്പദ്വ്യവസ്ഥയെന്ന ഇന്ത്യന് സ്വപ്നത്തിലേയ്ക്കുള്ള താക്കേല് കൂടിയാണ് യുപിഐ. റിപ്പോര്ട്ടുകള് ശരിവച്ചാല് യുപിഐ ഒരു വിപ്ലവകരമായ മാറ്റത്തിന് തയ്യാറെടുക്കുകയാണ്.
തമ്പ്പേ വരുന്നു
അതെ, ഇന്ത്യന് സ്റ്റാര്ട്ടപ്പ് പ്രോക്സി അവതരിപ്പിച്ച തമ്പ്പേ ആണ് നിലവിലെ സംസാരവിഷയം. ഇതൊരു ബയോമെട്രിക് പേയ്മെന്റ് ഉപകരണമാണ്. പണം, കാര്ഡുകള്, ക്യുആര് കോഡുകള്, എന്തിന് സ്മാര്ട്ട്ഫോണിന്റെ പോലും സഹായം കൂടാതെ ഇടാപാടുകള് പൂര്ത്തീകരിക്കാന് തമ്പ്പേയ്ക്ക് സാധിക്കും.
വിപ്ലവം ആയേക്കാവുന്ന കണ്ടുപിടിത്തം
പ്രോക്സിയുടെ ഈ പുതിയ കണ്ടുപിടിത്തം വിപ്ലവം ആയേക്കുമെന്നു പറയുന്നതിന് ചില കാരണങ്ങളുണ്ട്. അതില് പ്രധാനം അതിന്റെ വിലയാണ്. റിപ്പോര്ട്ടുകള് പ്രകാരം ഈ തമ്പ്പേ മെഷീന്റെ വില 2,000 രൂപയില് കൂടില്ല. കുറഞ്ഞ ചെലവും, പേയ്മെന്റുകളുടെ എളുപ്പവും ആണ് അടുത്ത കാരണം. നിലവില് പലപ്പോഴും മൊബൈല് പ്രശ്നങ്ങളും, ഉപയോക്താക്കളുടെ മറവിയുമെല്ലാം (പേഴ്സ്, കാര്ഡ്, പിന്) പേയ്മെന്റില് വെല്ലുവിളിയാകാറുണ്ട്. ഇതെല്ലാം തമ്പ്പേ എത്തുന്നതോടെ പരിഹരിക്കപ്പെടും. ചെറുകിട കടയുടമകളില്, പ്രത്യേകിച്ച് ഗ്രാമപ്രദേശങ്ങളില് പേയ്മെന്റ് വിപ്ലവത്തിന് കാരണമായേക്കാം തമ്പ്പേ.
തമ്പ്പേ പ്രവര്ത്തനം എങ്ങനെ??
ഉപയോക്താവിന്റെ ആധാര് വിവരങ്ങളും (ബയോമെട്രിക്സ്), ബാങ്ക് അക്കൗണ്ട് ലിങ്കിംഗും വഴിയാകും ഈ ഉപകരണം പ്രവര്ത്തിക്കുക. കഴിഞ്ഞ ദശകത്തില് ഇന്ത്യ ആധാറുംം യുപിഐയും നിര്മ്മിക്കാന് കഠിനാധ്വാനം ചെയ്തു. തമ്പ് പേ ഈ പ്ലാറ്റ്ഫോമുകളുടെ സൃഷ്ടിപരമായ സമന്വയമാണെന്ന് തമ്പ്പേ സ്ഥാപകനും, സിഇഒയുമായ പുല്കിത് അഹൂജ പറയുന്നു. ആളുകളെ അവരുടെ അന്തര്ലീനമായ ഐഡന്റിറ്റി മാത്രം ഉപയോഗിച്ച് ഇടപാടുകള് നടത്താന് അനുവദിക്കുന്നത് തട്ടിപ്പുകള് കുറയ്ക്കാനും സാധിക്കുമെന്ന് അദ്ദേഹം കൂട്ടിച്ചേര്ത്തു. ‘ഡിജിറ്റല് ഇന്ത്യ, ബൈ ഇന്ത്യ’ എന്ന മനോഭാവമാണ് തമ്പ്പേ പിന്തുടരുന്നതെന്നും അദ്ദേഹം ഫോര്ബ്സ് ഇന്ത്യ റിപ്പോര്ട്ടില് വ്യക്തമാക്കി.
തമ്പ്പേ സവിശേഷമാകുന്നതെങ്ങനെ?
രൂപകല്പ്പന മുതല് പ്രവര്ത്തനം വരെ തമ്പ്പേ ഒരു വിസ്മയമാണ്. ഒരു സര്ട്ടിഫൈഡ് ഫിംഗര്പ്രിന്റ് സ്കാനര്, ക്യാമറ, യുവി സ്റ്റെറിലൈസേഷന്, യുപിഐ സൗണ്ട്ബോക്സ്, 4ജി, വൈഫൈ, LoRaWAN പോലുള്ള കണക്റ്റിവിറ്റി ഫീച്ചറുകള് എന്നിവയോട് കൂടിയാണ് തമ്പ്പേ എത്തുന്നത്. നിലവിലെ ക്യൂആര് കോഡ് സൗണ്ട്ബോക്സുകള്ക്കു സമായമായി തമ്പ്പേ സൗണ്ട് ബോക്സും പ്രവര്ത്തിക്കും. ഇത് പേയ്മെന്റ് സംബന്ധിച്ച് തത്സമയ സ്ഥിരീകരണം ഉറപ്പാക്കും. ഇന്ത്യയുടെ എല്ലാ കോണുകളിലേക്കും ഡിജിറ്റല് പേയ്മെന്റുകള് എത്തിക്കാന് തമ്പ്പേ വഴി സാധിക്കുമെന്നാണ് പ്രോക്സിയുടെ അവകാശവാദം.
തമ്പ്പേ എന്ന് നടപ്പാക്കും?
പുതിയ പേയ്മെന്റ് സംവിധാനം എന്നു നടപ്പില് വരുമെന്നതാണ് ഏറ്റവും വലിയ ചോദ്യം. റിപ്പോര്ട്ടുകള് പ്രകാരം പ്രോക്സി പൈലറ്റ് പരിശോധന പൂര്ത്തിയാക്കിയിട്ടുണ്ട്. നിലവില് ബാങ്കുകളുമായും, ഫിന്ടെക് സ്ഥാപനങ്ങളുമായും പങ്കാളിത്തം സ്ഥാപിക്കുന്ന തിരക്കിലാണ് കമ്പനി. ആധാര്, യുപിഐ സേവനങ്ങള് ഉപയോഗിക്കുന്നതിനാല് UIDAI, NPCI എന്നിവയുടെ അനുമതിയും ആവശ്യമാണ്. സ്മാര്ട്ട്ഫോണുകളോ ഡിജിറ്റല് വാലറ്റുകളോ ഇല്ലാത്തവര്ക്ക് പോലും തമ്പ്പേ വഴി ഇടപാടുകള് നടത്താന് കഴിയുമെന്നതാണ് ഹൈലൈറ്റ്. അധികം വൈകാതെ തമ്പ്പേ ഉപയോക്താക്കളിലേയ്ക്ക് എത്തുമെന്നാണ് വിവരം.
