Kerala Times Bureau
Bangladesh Power Crisis > ബംഗ്ലാദേശിന്റെ സാമ്പത്തിക പ്രതിസന്ധി നാള്ക്കുനാള് വര്ധിക്കുകയാണ്. ഇതിനിടെ ഇന്ത്യയുമായി കൊമ്പുക്കോര്ക്കാനുള്ള യൂനുസ് സര്ക്കാരിന്റെ നീക്കം ബംഗ്ലാദേശിനെ ഒന്നാകെ ഇരുട്ടിലാക്കുന്നതായിരിക്കുമെന്ന് വിദഗ്ധര്. ബംഗ്ലാദേശ് മുന് പ്രധാനമന്ത്രി ഷെയ്ഖ് ഹസീനയ്ക്ക് ഇന്ത്യ അഭയം നല്കിയതാണ് നിലവിലെ പ്രതിസന്ധിക്ക് തുടക്കമിട്ടത്. നിലവിലെ ബംഗ്ലാദേശ് ഇടക്കാല സര്ക്കാര് ഹസീനയ്ക്ക് മരണശിക്ഷ വിധിച്ചിരുന്നു. എന്നാല് ഇന്ത്യ അവരെ വിട്ടുനല്കാന് തയ്യാറല്ല. ഇതോടെ ഇന്ത്യയുമായുള്ള ബംഗ്ലാദേശിന്റെ ബന്ധം വഷളായി.
ബംഗ്ലാദേശ് ഇരുട്ടിലാകും?
റിപ്പോര്ട്ടുകള് പ്രകാരം ബംഗ്ലാദേശിന്റെ പ്രധാന വൈദ്യുതി വിതരണ സ്രോതസ് ഇന്ത്യയാണ്. രൂക്ഷമായ വാതക ക്ഷാമം, കല്ക്കരി വൈദ്യുത നിലയങ്ങളിലെ അറ്റകുറ്റപ്പണി പ്രശ്നങ്ങള്, വര്ധിച്ചുവരുന്ന ആവശ്യകത എന്നിവ നേരിടുകയാണ് ബംഗ്ലാദേശ്. അതായത് ബംഗ്ലാദേശ് കടുത്ത വൈദ്യുതി പ്രതിസന്ധി നേരിടുന്നു. ഈ സാഹചര്യത്തില് ഇന്ത്യയുമായി ഇടയുന്നത് ഒരു രാജ്യത്തെ മുഴുവന് ഇരുട്ടിലാക്കിയേക്കാം
കണക്കുകള്ക്ക് പ്രധാന്യം
ബംഗ്ലാദേശിന്റെ വൈദ്യുതി ഡിമാന്ഡിന്റെ 17 ശതമാനം നിര്വഹിക്കുന്നത് ഇന്ത്യയാണ്. ഇതില് പ്രധാന റോള് വഹിക്കുന്നത് ഗൗതം അദാനിയുടെ അദാനി പവര് ആണ്. കമ്പനി മാത്രം പ്രതിദിനം ഏകദേശം 1,500 മെഗാവാട്ട് ബംഗ്ലാദേശിന് വിതരണം ചെയ്യുന്നു. ഇന്ത്യയുമായി കടുത്ത ഭിന്നിപ്പിലേയ്ക്ക് പോയാല് ബംഗ്ലാദേശിന് പണിയാകുന്നതും ഈ അമിത ആശ്രയത്വം തന്നെ. കാരണം പ്രാദേശിക വൈദ്യുതി നിര്മ്മാണം അവതാളത്തിലാണ്. നിലവില് ഇന്ത്യയുടെ വൈദ്യുതിയാണ് ബംഗ്ലാദേശില് വെളിച്ചം പരക്കാന് പ്രധാന കാരണം.
ആശ്രയത്വം കൂടിവരുന്നു
പ്രാദേശിക സംവിധാനങ്ങള് പാളിയതോടെ ഇന്ത്യന് വൈദ്യതിക്കായുള്ള ബംഗ്ലാദേശിന്റെ ഡിമാന്ഡ് വര്ധിക്കുകയാണ്. ബംഗ്ലാദേശ് സര്ക്കാരിന്റെ കണക്കുകള് പ്രകാരം കഴിഞ്ഞ വര്ഷത്തെ അപേക്ഷിച്ച് ഇന്ത്യയില് നിന്നുള്ള വൈദ്യുതി ഇറക്കുമതി ഏകദേശം 70 ശതമാനം വര്ധിച്ചിട്ടുണ്ട്. ഈ വര്ഷം ജൂലൈ വരെയുള്ള ആദ്യ ഏഴ് മാസങ്ങളില്, ഇറക്കുമതി വളരെയധികം കൂടിയതിനാല് ബംഗ്ലാദേശിന്റെ മൊത്തം വൈദ്യുതി വിതരണത്തില് ഇന്ത്യയുടെ പങ്ക് 9.5 ശതമാനത്തില് നിന്ന് 17 ശതമാനമായി കൂടി. അതായത് ബംഗ്ലാദേശ് ഒരു ദിവസം ഉപയോഗിക്കുന്ന ഓരോ 100 യൂണിറ്റ് വൈദ്യുതിയിലും ഏകദേശം 17 യൂണിറ്റ് ഇന്ത്യയില് നിന്നെത്തുന്നതാണ്.
കരാര് വലുത് തന്നെ
നിലവിലെ പ്രതിസന്ധി ബംഗ്ലാദേശിന്റെ ഇന്ത്യന് വൈദ്യുതി ആശ്രയത്വം ഇനിയും വര്ധിപ്പിക്കുമെന്നാണ് വിലയിരുത്തല്. നിലവിലെ കരാര് പ്രകാരം ഇന്ത്യയില് നിന്ന് ഏകദേശം 2,800- 3,000 മെഗാവാട്ട് വൈദ്യുതി ഇറക്കുമതി ചെയ്യാന് ബംഗ്ലാദേശിന് സാധിക്കും. അടുത്തിടെ പ്രതിദിന വാങ്ങല് ശരാശരി 2,200- 2,300 മെഗാവാട്ട് ആയിരുന്നു. ബംഗ്ലാദേശിന്റെ മൊത്തം വൈദ്യുതി ആവശ്യത്തിന്റെ ഏകദേശം 15- 17 ശതമാനം വരുമിത്. പക്ഷെ പ്രാദേശിക സ്രോതസുകള് കഷ്ടപ്പെടുന്ന സമയത്ത് ഈ കണക്കുകള് ഉടന് പഴങ്കഥയായേക്കും.
അദാനി പവര്
ബംഗ്ലാദേശിന് വൈദ്യുതി നല്കുന്ന ഇന്ത്യന് കമ്പനികളില് പ്രധാനി അദാനി പവര് തന്നെയാണ്. കമ്പനിയുടെ ജാര്ഖണ്ഡിലെ ഗോഡ്ഡ കല്ക്കരി വൈദ്യുത നിലയത്തില് നിന്നാണ് ബംഗ്ലാദേശിന് വൈദ്യുതി നല്കുന്നത്. പ്രതിദിനം ഏകദേശം 1,500 മെഗാവാട്ട് വൈദ്യുതി ഇവിടെ നിന്ന് നല്കുന്നു. ഇത് ബംഗ്ലാദേശിന്റെ ഇന്ത്യന് വാങ്ങലിന്റെ സിംഹഭാഗത്തെ പ്രതിനിധീകരിക്കുന്നു. അദാനിക്കു പുറമേ എന്ടിപിസി/ എന്വിവിഎന് (740 മെഗാവാട്ട്), പിടിസി ഇന്ത്യ ലിമിറ്റഡ് (250 മെഗാവാട്ട്), സെമ്പ്കോര്ബ് എനര്ജി ഇന്ത്യ ലിമിറ്റഡ് (170- 250 മെഗാവാട്ട്) എന്നിവരാണ് പ്രധാന ഇന്ത്യന് വിതരണക്കാര്.
