Kerala Times Bureau
NPCI Updates> വീണ്ടും യുപിഐയില് ഇടപെട്ട് നാഷണല് പേയ്മെന്റ്സ് കോര്പ്പറേഷന് ഓഫ് ഇന്ത്യ (എന്പിസിഐ). ഇത്തവണ ഇടപെടല് സെറ്റില്മെന്റ് സൈക്കിളുകളില് ആണ്. 2025 നവംബര് 3 മുതല് ഈ പുതിയ മാറ്റങ്ങള് പ്രാബല്യത്തില് വരും. അംഗീകൃതവും തര്ക്ക സെറ്റില്മെന്റുകളും (authorised and dispute settlements) വേര്തിരിക്കാനുള്ള എന്പിസിഐ നീക്കത്തിന്റെ ഭാഗമാണ് നടപടി. ഇതുവഴി പേയ്മെന്റ് സംവിധാനത്തിന്റെ പ്രവര്ത്തനക്ഷമത മെച്ചപ്പെടുത്താന് സാധിക്കുമെന്നാണ് വിലയിരുത്തല്.
പുതിയ സെറ്റില്മെന്റ് സൈക്കിളുകള്
ഉപയോക്താക്കളുടെ ട്രാന്സാക്ഷനുകളെ അവയുടെ തരത്തെ അടിസ്ഥാനമാക്കി വ്യത്യസ്ത സെറ്റില്മെന്റ് സൈക്കിളുകളായി വേര്തിരിക്കുക എന്നതാണ് പുതിയ സിസ്റ്റം കൊണ്ട് അര്ത്ഥമാക്കുന്നത്. നവംബര് 3 മുതല് നിലവിലുള്ള പത്ത് ദൈനംദിന സെറ്റില്മെന്റ് സൈക്കിളുകള് ഓതറൈസേഷന് ഇടപാടുകള്ക്കു മാത്രമുള്ളതായിരിക്കും. അതായത് വിജയകരമായ ഇടപാടുകള് മാത്രമാകും ഇവിടെ കൗണ്ട് ചെയ്യുക. ഈ സൈക്കിളുകള്ക്കുള്ള സമയക്രമങ്ങള് മാറ്റമില്ലാതെ തുടരും.
അതേസമയം തര്ക്ക ഇടപാടുകള്ക്കായി ഒരു പുതിയ സെറ്റില്മെന്റ് പ്രക്രിയ എന്പിസിഐ അവതരിപ്പിക്കും. ഇത്തരം തര്ക്ക പരിഹാരങ്ങള് പ്രതിദിനം രണ്ട് സമര്പ്പിത സൈക്കിളുകളായി കൈകാര്യം ചെയ്യും. പരാജയപ്പെട്ട ഇടപാടുകള്, ചാര്ജ്ബാക്കുകള്, മറ്റ് തര്ക്കങ്ങള് എന്നിവ പരിഹരിക്കുന്നതിന് ഒരു പ്രത്യേക പ്രക്രിയയും, സമയ വിന്ഡോയും വരുന്നുവെന്നാണ് മനസിലാക്കേണ്ടത്.
ഉപയോക്താക്കളെ ബാധിക്കുമോ?
ഒരു ശരാശരി യുപിഐ ഉപയോക്താവിനെ സംബന്ധിച്ച് ഈ മാറ്റങ്ങള് വളരെ പോസിറ്റീവ് ആണ്. പക്ഷെ ഉടനടി ശ്രദ്ധയില്പ്പെടാന് സാധ്യതയില്ല. നേട്ടങ്ങളിലേയ്ക്ക് വരുമ്പോള്, വേഗമേറിയതും കൂടുതല് വിശ്വസനീയവുമായ ഇടപാടുകള് സാധ്യമാകും. തര്ക്കങ്ങള് കൈകാര്യം ചെയ്യാന് പുതിയ വിന്ഡോ വരുന്നതോടെ ഇടപാട് വേഗവും വര്ധിക്കും. ഇടപാട് പരാജയപ്പെടുകയോ, തര്ക്കത്തിലാകുകയോ ചെയ്യുന്ന സമയങ്ങളില് ഈ സമര്പ്പിത പരിഹാര ചക്രം പ്രക്രിയയെ കാര്യക്ഷമമാക്കുമെന്ന് പ്രതീക്ഷിക്കുന്നു. റീഫണ്ടുകള്, പേയ്മെന്റ് പരിഹരം എന്നിവ കാര്യക്ഷമമാകും. അതായത് തടസപ്പെട്ട പേയ്മെന്റുകള് പെന്ഡിംഗ്, പ്രോസസ്സിംഗ് ടാഗുകളില് അധിക സമയം കുടുങ്ങില്ല.
എന്തുകൊണ്ട് ഇപ്പോള്? യുപിഐ ഇടപാടുകളുടെ എണ്ണം നാള്ക്കുനാള് വര്ധിച്ചുവരുന്ന സാഹചര്യത്തിലാണ് എന്പിസിഐയുടെ നടപടി. യുപിഐ ഇന്ത്യന് ഡിജിറ്റല് പേയ്മെന്റുകളുടെ നട്ടെല്ലായി മാറിക്കഴിഞ്ഞു. നിലവില് ഇടയ്ക്കിടെയുള്ള കാലതാമസങ്ങളും, ഇടപാട് പരാജയങ്ങളും ഉപയോക്താക്കളെ മടുപ്പിക്കുന്നതാണ്. ഇടപാടുകളെ തരംതിരിച്ച് കൈകാര്യം ചെയ്യുന്നത് സിസ്റ്റം ലോഡ് കുറയ്ക്കും. ഇതുവഴി സെര്വര് ലോഡ് കൈകാര്യം ചെയ്യാനും, കാര്യക്ഷമത വര്ധിപ്പിക്കാനും സാധിക്കും.
