Kerala Times Bureau
Youtuber Faizal Khan> ഇന്ത്യയില് ചികിത്സ ചെലവുകള് നാള്ക്കുനാള് വര്ധിച്ചുകൊണ്ടിരിക്കുന്നു. ഇന്ഷുറന്സുകള് കൂടാതെ പല ചികിത്സങ്ങളും ഇന്ന് സാധ്യമല്ലെന്ന തരത്തില് കാര്യങ്ങള് മാറി കഴിഞ്ഞു. സാധാരണക്കാരെ സംബന്ധിച്ച് ഏക ആശ്രയം സര്ക്കാര് ആശുപത്രികളാണ്. എന്നാല് ഇന്ന് ഇവിടെയും ടെസ്റ്റുകള്ക്കും മറ്റും പണം നല്കേണ്ട സാഹചര്യമുണ്ട്. പല സര്ക്കാര് ആശുപത്രികളിലേയും ഇന്ഷുറന്സുകള് കാര്യക്ഷമവുമല്ല. ഇവിടെയാണ് പ്രശസ്ത യൂട്യൂബറായ ഫൈസല് ഖാനിന്റെ ആശുപത്രി( Khan SIR Cancer Hospital) സൂപ്പര് ഹിറ്റാകുന്നത്. ഫൈസല് ഖാന് എന്നു പറഞ്ഞാല് നിങ്ങളില് പലരും അറിയണമെന്നില്ല. കാരണം അദ്ദേഹം അറിയപ്പെടുന്നത് ഖാന് സര് എന്നാണ്
ഖാന് സറിന്റെ ആശുപത്രി
രാജ്യത്ത് യൂട്യൂബില് വലിയൊരു ആരാധകവൃന്ദമുള്ള കണ്ടന്റ് ക്രിയേറ്ററുമാരില് ഒരാളാണ് ഖാന് സര്. അറിയപ്പെടുന്ന അധ്യാപകന് ഇന്ന് ഒരു സംരംഭകന് കൂടിയാണ്. യൂട്യൂബില് നിന്നു വരുമാനം അടക്കം അദ്ദേഹം തുടങ്ങിയിരിക്കുന്നത് ഒരു ആശുപത്രിയാണ. സ്വകാര്യ ആശുപത്രികളില് പലതും രാജ്യത്ത് പണം സമ്പാദിക്കാനുള്ള ഒരു മാര്ഗം മാത്രമായി മാറുമ്പോള്, സര്ക്കാര് ആശുപത്രികളെ പോലും അമ്പരപ്പിക്കുന്ന വാഗ്ദാനമാണ് ഖാന് സറിന്റെ ആശുപത്രിയില് നിന്നുണ്ടാകുന്നത്.
വളരെ കുറഞ്ഞ ചെലവില് സേവനം
താങ്ങാനാവുന്ന വിലയ്ക്ക് ആരോഗ്യ സംരക്ഷണം എന്നത് യാഥാര്ത്ഥ്യമാകുകയാണ് ഖാന് സറിന്റെ ആശുപത്രിയില്. സ്വകാര്യ, സര്ക്കാര് ആശുപത്രികളെ അപേക്ഷിച്ച് വളരെ കുറഞ്ഞ വിലയ്ക്കാണ് ഇവിടെ ചികിത്സയും, മെഡിക്കല് പരിശോധനകളും. പണം ഇല്ലാത്തതു മൂലം ആര്ക്കും ചികിത്സ കിട്ടാതിരിക്കരുതെന്ന പിടിവാശിയാണ് ഇത്തരമൊരു സംരംഭത്തിലേയ്ക്ക് ഖാന് സറിനെ എത്തിച്ചത്. അമ്മയാണ് അതിനുള്ള കരുത്ത് മകന് പകര്ന്നത്.
സേവനങ്ങളും നിരക്കുകളും
ഖാന് സറിന്റെ ആശുപത്രി ചെറിയൊരു ക്ലിനിക്ക് ആണെന്ന് തെറ്റിദ്ധരിക്കേണ്ട. എല്ലാ സേവനങ്ങളും ഇവിടെ ലഭ്യമാണ്. ബിഹാറിലെ പാട്നയിലാണ് ഈ ആശുപത്രി സ്ഥിതി ചെയ്യുന്നത്. രക്തപരിശോധനയ്ക്ക് വെറും 7 രൂപയും, ഇസിജിക്ക് 25 രൂപയുമാണ് ഇവിടെ ഈടാക്കുന്നത്. മറ്റു പ്രധാന ചികിത്സകളും സര്ക്കാര് ആശുപത്രികളേക്കാളും വിലകുറഞ്ഞതായിരിക്കുമെന്ന് ഈ അധ്യാപകന് ഉറപ്പുനല്കുന്നു. റിപ്പോര്ട്ടുകള് പ്രകാരം ഡയാലിസിസും, ക്യാന്സര് ചികിത്സയും എല്ലാം ഈ ആശുപത്രിയില് ലഭ്യമാണ്.
ആരാണ് ഖാന് സര്
ഇന്ത്യന് ആര്മിയുടെ ഭാഗം ആകാന് കൊതിച്ച് നടക്കാതെ പോയ ലക്ഷകണക്കിന് ആളുകളില് ഒരാളാണ് ഖാന് സര്. ശാരീരികക്ഷമതയുടെ ആവശ്യകതകളാണ് അദ്ദേഹത്തിനു വിലങ്ങ് തടിയായത്. തുടര്ന്ന് ആധ്യാപക ജോലി സന്തോഷത്തോടെ ഏറ്റെടുത്തു. തനിക് നേടാന് സാധിക്കാത്തത് ശിഷ്യരെ കൊണ്ട് നേടുകയായിരുന്നു ലക്ഷ്യം. ഓണ്ലൈണ് മീഡിയകളില് പ്രിയപ്പെട്ട ഗുരുവായി അദ്ദേഹം മാറി. അറിയപ്പെടുന്ന ഒരു യൂട്യൂബറായി മാറി.
എന്തുകൊണ്ട് ആശുപത്രി
പഠിപ്പിക്കലിനൊപ്പം സമൂഹത്തിലെ സമകാലിക പ്രശ്നങ്ങളിലും അദ്ദേഹം സംസാരിച്ചിരുന്നു. ആശുപത്രികളിലെ ചെലവുകള് പലപ്പോഴും വിഷയമായിരുന്നു. ആശുപത്രി തുടങ്ങാനുള്ള പ്രാഥമിക പ്രചോദനം അമ്മയില് നിന്നാണെന്ന് അദ്ദേഹം പറയുന്നു. ബിഹാര് സംസ്ഥാനത്തുടനീളം കൂടുതല് ആശുപത്രികള് സ്ഥാപിക്കാനാണ് അദ്ദേഹം ലക്ഷ്യമിടുന്നത്. ഓരോ ബ്രാഞ്ച് ആശുപത്രിക്കും സ്പെഷ്യലൈസേഷനോടുകൂടിയ ഒരു മെഡിക്കല് ചികിത്സ ഉറപ്പാക്കാനും അദ്ദേഹം ആഗ്രഹിക്കുന്നു.
