സമീപകാലത്തായി അഗ്രസീവായ ബിസിനസ് വികസനമാണ് റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി നടത്തുന്നത്. നിലവിൽ ഡിജിറ്റൽ അഡ്വർടൈസിങ് മേഖലയിൽ ധൈര്യത്തോടെയുള്ള ഒരു ചുവടാണ് റിലയൻസ് വെച്ചിരിക്കുന്നത്. ന്യൂറോ സയൻസ് അധിഷ്ഠിത ഗവേഷണങ്ങളിലൂടെ സ്ട്രീമിങ് പരസ്യങ്ങളുമായി ബന്ധപ്പെട്ട് കൂടുതൽ എൻഗേജ്മെന്റ്സ് റിലയൻസ് നേടുന്നതായിട്ടാണ് റിപ്പോർട്ടുകൾ.
ചെറിയ പരസ്യദാതാക്കളെ ആകർഷിക്കുന്നതിലൂടെ റിലയൻസിന്റെ ഡിജിറ്റൽ & സ്ട്രീമിങ് വരുമാനം വർധിക്കുന്നതായി കണക്കുകൾ സൂചിപ്പിക്കുന്നു. ന്യൂസ് ഏജൻസിയായ റോയിട്ടേഴ്സ് പുറത്തു വിട്ട രേഖകൾ പ്രകാരം ബ്രെയിൻ മാപ്പിങ് റിസർച്ചിലൂടെ അഡ്വർഡൈസിങ് ഏജൻസികളെ റിലയൻസ് സ്വകാര്യമായി സ്വാധീനിക്കുന്നു. ഉപയോക്താക്കളുടെ ബ്രെയിൻ സെല്ലുകൾ (ന്യൂറോൺസ്) വിശകലനം ചെയ്യുന്ന ബ്രെയിൻ മാപ്പിങ് റിസർച്ചിലൂടെ, ഗൂഗിളിനേക്കാൾ ഉയർന്ന എൻഗേജ്മെന്റ് റേറ്റ് പരസ്യങ്ങളുടെ സ്ട്രീമിങ്ങിന് ലഭിക്കുന്നതായി കമ്പനി അവകാശപ്പെടുന്നതായിട്ടാണ് റിപ്പോർട്ടുകൾ.
ചെറുകിട പരസ്യദാതാക്കളിലേക്ക് ബിസിനസ് വികസിപ്പിക്കുന്നതിലാണ് ഇപ്പോൾ റിലയൻസ് ശ്രദ്ധ കേന്ദ്രീകരിക്കുന്നത്. ഇതോടൊപ്പം ഡിജിറ്റൽ ആഡ് ഇൻവെന്ററി വികസനത്തിലൂടെ വരുമാന വളർച്ചയാണ് ലക്ഷ്യം. വരാനിരിക്കുന്ന ഇന്ത്യൻ പ്രീമിയർ ലീഗിലൂടെ (IPL) കൂടുതൽ വരുമാന വർധനയാണ് ജിയോ ഹോട്സ്റ്റാർ ലക്ഷ്യമിടുന്നത്. ലോകത്തിലെ ഏറ്റവും മൂല്യമേറിയ ക്രിക്കറ്റ് ലീഗാണ് IPL. ചെറിയ കമ്പനികൾക്ക് ഐ.പി.എൽ അഡ്വർടൈസർമാരാകാൻ അവസരം നൽകുന്ന പാക്കേജുകൾ ആകെ 17,000 ഡോളർ മൂല്യമുള്ളവയാണ്. 40 മില്യൺ സ്മാർട് ടെലിവിഷനുകൾ, 420 മില്യൺ മൊബൈൽ ഡിവൈസുകൾ എന്നിവയിലേക്ക് സ്ട്രീമിങ് സർവീസുകൾ എത്തിക്കുകയാണ് ലക്ഷ്യം.
റിലയൻസിന്റെ ജിയോ സിനിമ, ഡിസ്നി+ ഹോട്സ്റ്റാർ എന്നിവ തമ്മിലുള്ള ലയനത്തിലൂടെ രൂപമെടുത്ത പ്ലാറ്റ്ഫോമാണ് ജിയോ ഹോട്സ്റ്റാർ. ഈ പുതിയ പ്ലാറ്റ്ഫോമിൽ 3 ലക്ഷം മണിക്കൂർ ദൈർഘ്യമുള്ള എന്റർടെയിൻമെന്റ്, ലൈവ് സ്പോർട്സ് കവറേജ് എന്നിവയാണുള്ളത്. 50 കോടിയിലധികം ഉപയോക്താക്കളാണ് ഈ പ്ലാറ്റ്ഫോമിലുള്ളത്. പ്രീമിയം എന്റർടെയിൻമെന്റ് കണ്ടന്റുകൾ എല്ലാ ഇന്ത്യക്കാർക്കും ലഭ്യമാക്കുകയാണ് തങ്ങളുടെ ലക്ഷ്യമെന്ന് ജിയോ ഹോട്സ്റ്റാർ ഡിജിറ്റൽ സി.ഇ.ഒ കിരൺ മാനി പറഞ്ഞിരുന്നു. നിർമിത ബുദ്ധി അധിഷ്ഠിത റെക്കമെൻഡേഷനുകൾ, സ്ട്രീമിങ് എന്നിവ 19ൽ അധികം ഭാഷകളിൽ ലഭ്യമാണ്. ഇതു വരെയുണ്ടാകാത്ത തരത്തിൽ കണ്ടന്റുകൾ പേഴ്സണലൈസ്ഡ് ആയി ലഭ്യമാണെന്നും അദ്ദേഹം പറഞ്ഞു.
2025 മാർച്ച് 22ന് ആരംഭിക്കുന്ന ഐ.പി.എൽ മത്സരങ്ങൾ 60 ദിവസം നീണ്ടു നിൽക്കും. 2023 മുതൽ ജിയോ സൗജന്യമായി നൽകി വരുന്ന ഐ.പി.എൽ സ്ട്രീമിങ് ജിയോ ഹോട് സ്റ്റാർ ആപ്ലിക്കേഷനിൽ ഈ മാസം അവസാനത്തോടെ നിർത്തലാക്കാൻ ലക്ഷ്യമിടുന്നതായും റിപ്പോർട്ടുകളുണ്ട്. ഇത്തരത്തിൽ വരുമാന വർധന കൂടുതൽ നേടുകയാണ് ലക്ഷ്യം.
