Kerala Times Bureau
Second Hand Phones> മൊബൈല് ഫോണുകള് ഇന്ന് ആളുകളുടെ നിത്യജീവിതത്തിന്റെ ഭാഗമാണ്. പുതിയ മോഡലുകള് എത്തുമ്പോള് പഴയ മോഡലുകള് മാറുന്ന പ്രവണതയും ഇന്നു കൂടുതലാണ്. ഓണ്ലൈനുകളില് ഓഫറുകള് ലഭ്യമാണെങ്കിലും പുതിയ മൊബൈല് കടകള് തുറക്കുന്നത് തുടരുന്നു. വിപണികളില് മൊബൈലുകള്ക്കുള്ള ഡിമാന്ഡും, സാധ്യതകളുമാണ് ഇതിനു കാരണം. ഒരു മൊബൈല് ഫോണ് കടയുടെ ലാഭം എന്തായിരിക്കുമെന്ന് നിങ്ങള് ചിന്തിച്ചിട്ടുണ്ടോ? ഇത് അവര് കൈകാര്യം ചെയ്യുന്ന മോഡലുകളെയും, വില്പ്പനയേയും ആശ്രയിച്ചിരിക്കും. ഇന്നു ഇതിനെ കുറിച്ചാണ് നമ്മള് നോക്കുന്നത്.
മാര്ജിനിലാണ് കളി
ഒരു മൊബൈല് ഫോണ് വില്ക്കുമ്പോഴും അതിന്റെ ഒരു വിഹിതം കടയുമയ്ക്ക് ലഭിക്കുന്നുണ്ട്. ഇതിനെ മാര്ജിന് എന്നു പറയാം. റിലയന്സ് സ്റ്റോര് മാനേജരായ അലോക് ശര്മ്മയുടെ വാക്കുകള് പ്രകാരം സാംസംഗ് ഫോണുകള്ക്കാണ് ഏറ്റവും ഉയര്ന്ന ലാഭ മാര്ജിനുള്ളത്. ഇത് ഏകദേശം 11-14% ആണെന്ന് റിപ്പോര്ട്ടുകള് വ്യക്തമാക്കുന്നു. വിവോ, ഒപ്പോ പോലുള്ള ചൈനീസ് ബ്രാന്ഡുകള്ക്ക് ഇത് 8- 10% ആണ്. വണ്പ്ലസ്, റെഡ്മി, മോട്ടറോള പോലെയുള്ളവയുടെ വില്പ്പനയില് പലപ്പോഴും മാര്ജിന് 3-4% മാത്രമാണെന്നും റിപ്പോര്ട്ടുകള് വ്യക്തമാക്കുന്നു. ആ്പ്പിള് ഐഫോണിലേയ്ക്ക് വരുമ്പോള് ഈ വില്പ്പന മാര്ജിന് 4- 5% ആണ്. കടയുടമകള് സാംസങ്, വിവോ, ഒപ്പോ ഫോണുകള്ക്ക് പ്രചാരം നല്കാനുള്ള കാരണം മനസിലായില്ലേ?
കടയുടമകള് എങ്ങനെ സമ്പാദിക്കുന്നു
ഒരു ഫോണില് നിന്ന് കടയുടമകള് എത്ര സമ്പാദിക്കുന്നുവെന്നതാണ് അടുത്ത ചോദ്യം. വിലയും ബ്രാന്ഡും അനുസരിച്ച് ലാഭം മാറുമെന്ന് ആദ്യമേ പറയട്ടേ. 10,000 രൂപയുടെ ഒരു സാംസംഗ് ഫോണ് വിറ്റാല് ഏകദേശം 1,200- 1,300 രൂപ ലഭിക്കും. മറ്റു ബ്രാന്ഡുകളിലേയ്ക്ക് വരുമ്പോള് ഇത് 300- 1,000 രൂപ വരെയാണ്. റിപ്പോര്ട്ടുകള് പ്രകാരം 20,000 വിലയുള്ള ഒരു ഫോണ് വില്ക്കുമ്പോള് കടയുടമയ്ക്ക് 1,500- 2,500 രൂപ കിട്ടും. 30,000 വിലയുള്ള ഒരു ഫോണില് മാര്ജിന് 2,500- 3,500 രൂപവരെയാണ്. 40,000 വിലയുള്ള ഒരു ഫോണ് 3,500-4,500 രൂപ നല്കും. 50,000 വിലയുള്ള ഫോണിന് ഇത് 5,000- 6,000 രൂപ വരെയാണ്.
ഐഫോണിന് ലാഭം കുറവ്
റിപ്പോര്ട്ടുകള് അനുസരിച്ച് ഐഫോണ് വില്പ്പനയില് കടക്കാര്ക്ക് ലാഭം കുറവാണ്. എന്നാല് ഡിമാന്ഡ് കൂടുതല് ആയതിനാല് തന്നെ വില്പ്പന നടക്കുന്നു. ഇത് വരുമാനം ജനറേറ്റ് ചെയ്യുന്നു. 1 ലക്ഷം വരെയുള്ള ഫോണുകള്ക്ക് ലാഭം 4- 5% ആണ്. അതായത് ഏകദേശം 4,000- 5,000 രൂപ. അതേ സ്ഥലത്ത് സാംസംഗിന്റെ 1 ലക്ഷം രൂപയുടെ ഫോണ് 10,000 രൂപ വരെ മാര്ജിന് നല്കുന്നു.
ഓണ്ലൈനില് എന്തുകൊണ്ട് വില കുറയുന്നു
എന്തുകൊണ്ട് ഓണ്ലൈനില് ഫോണുകള്ക്ക് വിലകുറയുന്നുവെന്ന് ചോദിച്ചാല് ഉത്തരം ചെലവാണ്. കടയുടമകള് ലഭിക്കുന്ന വരുമാനത്തില് നിന്ന് വാടക, വേതനം തുടങ്ങിയ കാര്യങ്ങള് കണ്ടെത്തേണ്ടതുണ്ട്. അതേസമയം ഓണ്ലൈനില് ഈ ചെലവുകള് വളരെ കുറവാണ്. കൂടാതെ ഓണ്ലൈനുകള് കമ്പനികളില് നിന്ന് വലിയ പര്ച്ചേസുകള് നടത്തുമ്പോള് ഓഫറുകളും, കിഴിവുകളും കിട്ടുന്നു. ഇതും ഇളവിന് വഴിവയ്ക്കുന്നു. പലപ്പോഴും ബള്ക്കായി ഫോണുകള് എടുക്കുമ്പോള് എണ്ണത്തിന് അനുസരിച്ച ഫ്രീ യൂണിറ്റുകള് അനുവദിക്കുന്നു. ഇതും അവര്ക്ക് വരുമാനം നല്കുന്നു.
2025 ലെ ഫേവറൈറ്റ് ഫോണുകള്
കണക്കുകള് പ്രകാരം ഇന്ത്യന് വിപണികളില് 2025 ഒന്നാം പാദത്തില് ഏറ്റവും കൂടുതല് വിറ്റഴിക്കപ്പെട്ട ഫോണ് ബ്രാന്ഡ് വിവോ ആണ്, 22%. സാംസങ് 16%, ഷവോമി 12%, ഒപ്പോ 12%, റിയല്മി 11% എന്നിവയാണ് പിന്നിലുള്ളത്.
സെക്കന്ഡ്ഹാന്ഡ് കച്ചവടത്തിലാണ് കളി
പുതിയ ഡിവൈസുകള് വാങ്ങുമ്പോള് മാര്ജിന് കുറവാണ്. പക്ഷെ സെക്കന്ഡ് ഹാന്ഡ് കച്ചവടമാണ കടയുടമകളുടെ പ്രധാന വരുമാന മാര്ഗം. പലരും പുതിയ ഫോണുകള് എക്സ്ചേഞ്ച് ചെയ്താണ് പുതിയ ഫോണുകള് കടകളില് നിന്ന് വാങ്ങുന്നത്. പഴയ ഫോണുകള്ക്ക് ഒരു നിശ്ചിത തുക നിര്ണയിക്കപ്പെടുന്നു. എന്നാല് ഇവ മറ്റൊരു ഉപയോക്താവിന് വില്ക്കുമ്പോള് കടയുടമകള് പലപ്പോഴും വലിയ മാര്ജിന് നേടുന്നു. ഇത് പലപ്പോഴും ഒന്നോ, രണ്ടോ പുതിയ ഡിവൈസുകള് വില്ക്കുന്നതില് നിന്ന് ലഭിക്കുന്നതിനേക്കാള് കൂടുതലായിരിക്കും. 10,000 രൂപയുടെ ഒരു പുതിയ ഫോണിൽ നിന്ന് കടക്കാർക്ക് 1,500- 2,000 കിട്ടുന്നുവെന്ന് കരുതുക. അതേസമയം 10,000 രൂപയുടെ ഒരു സെക്കൻഡ് ഹാൻഡ് ഫോൺ വിൽപ്പനയിൽ നിന്ന് ഇതു പലപ്പോഴും 2,500- 3,000 ആകുന്നു.
(Disclaimer: മുകളില് പറഞ്ഞ കാര്യങ്ങള് നിലവില് ലഭ്യമായ വിവരങ്ങളും, റിപ്പോര്ട്ടുകളും അടിസ്ഥാനമാക്കി മാത്രമാണ്. അന്തിമമല്ല, മാറ്റങ്ങള് ഉണ്ടാകാം.)
