Kerala Times Bureau
UPI New Rules> നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ (എന്പിസിഐ) പ്രഖ്യാപിച്ച യുപിഐ മാറ്റങ്ങള് ഇന്നുമുതല് (സെപ്റ്റംബര് 15) പ്രാബല്യത്തില് വന്നു. പ്രത്യേക വിഭാഗത്തിലുള്ള പേയ്മെന്റുകള്ക്കായുള്ള യുപിഐ് ഇടപാട് പരിധികളിലെ മാറ്റങ്ങളാണ് ഉപയോക്താക്കള് മനസിലാക്കേണ്ടത്. പ്രത്യേകിച്ച് ഗൂഗിള്പേ, ഫോണ്പേ, പേടിഎം പോലുള്ള യുപിഐ ആപ്പ് ഉപയോക്താക്കള്. ഉയര്ന്ന മൂല്യമുള്ള ഡിജിറ്റല് ഇടപാടുകള് സുഗമമാക്കുക എന്ന ലക്ഷ്യത്തോടെയാണ് ഈ മാറ്റങ്ങള് പ്രഖ്യാപിച്ചിട്ടുള്ളത്.
ഇടപാട് പരിധി 5 ലക്ഷത്തിലേയ്ക്ക്
ചില യുപിഐ വഴിയുള്ള ഇടപാടുകളുടെ പരിധി 2 ലക്ഷത്തില് നിന്ന് 5 ലക്ഷമായി എന്പിസിഐ ഉയര്ത്തിയിട്ടുണ്ട്. മൂലധന വിപണി, ഇന്ഷുറന്സ് പ്രീമിയം പോലുള്ള ഇടപാടുകളെ ലക്ഷ്യമിട്ടുള്ളതാണ് ഈ നീക്കം. അതേസമയം മിക്ക കേസുകളിലും പ്രതിദിന ഇടപാട് പരിധി 10 ലക്ഷം രൂപയായി തന്നെ തുടരും. സര്ക്കാര് ഇ-മാര്ക്കറ്റ്പ്ലേസ് (GeM), നികുതി പേയ്മെന്റുകള്, യാത്രാ ബുക്കിംഗുകള്, ക്രെഡിറ്റ് കാര്ഡ് ബില് പേയ്മെന്റുകള് എന്നിവയ്ക്ക് ഈ പുതുക്കിയ പരിധി ബാധകമാണ്.
മെച്ചപ്പെടുത്തിയ മറ്റ് പരിധികള്
സ്വര്ണ്ണവിലയിലെ വര്ധന കണക്കിലെടുത്ത് ആഭരണ വാങ്ങല് പരിധി ഉയര്ത്തിയിട്ടുണ്ട്. ആഭരണ ഇടപാടുകളുടെ പരിധി 1 ലക്ഷം രൂപയില് നിന്ന് 2 ലക്ഷമായാണ് ഉയര്ത്തിയത്. പ്രതിദിന പരിധി 6 ലക്ഷം രൂപയാണ്. ഡിജിറ്റല് അക്കൗണ്ട് തുറക്കല്ലില് ഓരോ ഇടപാടിനും പ്രതിദിന പരിധി 5 ലക്ഷമായി ഉയര്ത്തിയിട്ടുണ്ട്. ബിസിനസ്/ വ്യാപാരി പേയ്മെന്റുകളുടെ പരിധിയും 5 ലക്ഷമാക്കി ഉയര്ത്തി. അതേസമയം ഇവിടെ ദൈനംദിന പരിധിയില്ലെന്നത് പ്രത്യേകം ശ്രദ്ധിക്കുക.
വ്യക്തികളുടെ പരിധിയില് മാറ്റമില്ല
പതിവ് യുപിഐ വ്യക്തിഗത പരിധികള്ക്ക് പുതിയ നിര്ദേശങ്ങള് ബാധകമല്ല. അതായത് ഒരു വ്യക്തി മറ്റൊരു വ്യക്തിക്ക് (P2P) കൈമാറ്റം ചെയ്യുന്നതിനുള്ള സ്റ്റാന്ഡേര്ഡ് പ്രതിദിന ഇടപാട് പരിധി 1 ലക്ഷമായി തന്നെ തുടരും.
മറ്റു യുപിഐ മാറ്റങ്ങള്
ഉപയോക്താക്കളുടെ സൗകര്യാര്ത്ഥം എന്പിസിഐ യുപിഐയില് സജീവ ഇടപെടല് തുടരുന്നു. ഇക്കഴിഞ്ഞ ഓഗസ്റ്റില് യുപിഐയില് വന്ന ചില മാറ്റങ്ങള് ശ്രദ്ധേയമാണ്. ഉപയോക്താക്കള്ക്ക് ഒരു ആപ്പില് പ്രതിദിനം 50 തവണ മാത്രമേ ബാലന്സ് പരിശോധിക്കാന് കഴിയൂ. ഓരോ വിജയകരമായ ഇടപാടിനു ശേഷവും നിങ്ങളുടെ ബാങ്ക് ബാലന്സ് സ്വയമേവ കാണിക്കുമെന്നതും ശ്രദ്ധിക്കുക.
ഒരു യുപിഐ ആപ്പില് ഇപ്പോള് പ്രതിദിനം 25 ബാങ്ക് അക്കൗണ്ടുകള് വരെ മാത്രമേ ലിങ്ക് ചെയ്യാന് കഴിയൂ. ഇടപാട് സ്റ്റാറ്റ് പരിശോധിക്കാന് ഒരു പണമടയ്ക്കല് ശ്രമത്തിനിടയില് 90 സെക്കന്ഡ് ഇടവേള നിര്ബന്ധമാണ്. കൂടാതെ സ്റ്റാറ്റസ് പരിശോധിക്കല് എണ്ണം മൂന്നായി പരിമിതപ്പെടുത്തുകയും ചെയ്ു. പേയ്മെന്റ് സുതാര്യത വര്ധിപ്പിക്കുന്നതിനായി ഇടപാട് സമയത്ത് പണം സ്വീകരിക്കുന്നയാളുടെ പേര് പ്രദര്ശിപ്പിക്കാനും എന്പിസിഐ നിര്ബന്ധിക്കുന്നു. അതായത് യുപിഐ ആപ്പുകള് സ്വീകര്ത്താവിന്റെ ബാങ്കില് രജിസ്റ്റര് ചെയ്ത പേര് പ്രദര്ശിപ്പിക്കും.
