Kerala Times Bureau
Indigo Flight Problems> രാജ്യത്ത് വിമാന സര്വീസ് മുടങ്ങല് ഒരു തുടര്ക്കഥയാകുകയാണ്. ദിവസവും നൂറുകണക്കിന് സര്വീസുകളാണ് ഇന്ഡിഗോ റദ്ദാക്കുന്നത്. പലരും ചെക്ക് ഇന് ചെയ്ത് വിമാനത്തിനായി കാത്തിരിക്കുമ്പോഴാണ് സര്വീസ് റദ്ദാക്കിയെന്ന വിവരം, അല്ലെങ്കില് മണിക്കൂറുകള് വൈകിയെന്ന വിവരം അറിയുന്നത്. തുടര്ച്ചയായ സര്വീസ് റദ്ദാക്കലിന് നടപടി എടുക്കാതിരിക്കാന് വ്യക്തമായ കാരണം കാണിക്കാന് ആവശ്യപ്പെട്ട് ഡിജിസിഎ ഇന്ഡിഗോയ്ക്ക് നോട്ടീസ് വരെ അയച്ചു കഴിഞ്ഞു. എന്നാല് നിലവില് ലഭ്യമായ റിപ്പോര്ട്ടുകള് പ്രകാരം ഒരാഴ്ചകൂടി സര്വീസുകള് താറുമാറായി തുടര്ന്നേക്കാം.
ഇന്ഡിഗോ പ്രതിസന്ധി
കഴിഞ്ഞ നാല് ദിവസത്തിനുള്ളില് 1,300-ലധികം വിമാനങ്ങള് കമ്പനി റദ്ദാക്കിയിട്ടുണ്ട്്. മുംബൈ, ഡല്ഹി, ബംഗളൂരു, ഹൈദരാബാദ് എന്നിവിടങ്ങളില് യാത്രക്കാര്ക്ക് 10 മുതല് 12 മണിക്കൂര് വരെ കാത്തിരിക്കേണ്ടി വന്നെന്നാണ് വിവരം. 24 മണിക്കൂറിലധികം കാത്തിരിക്കേണ്ടി വന്ന കേസുകളുമുണ്ട്. ഈ സാഹചര്യത്തില് ഒരു വിമാനം വൈകുകയോ, റദ്ദാക്കുകയോ ചെയ്താല് യാത്രക്കാര് അവരുടെ അവകാശങ്ങളെ പറ്റി അറിഞ്ഞിരിക്കേണ്ടത് അനിവാര്യമാണ്. ഇക്കാര്യങ്ങളാണ് ഇനി പറയുന്നത്. 2019 ല് ഡിജിസിഎ തന്നെ ഇക്കാര്യങ്ങളില് വ്യക്തത വരുത്തിയിട്ടുണ്ട്.
ചെക്ക് ഇന്നിന് ശേഷം വിമാനം വൈകിയാല്
ഒരു യാത്രികന് നിര്ദിഷ്ട സമയത്തിനുള്ളില് ചെക്ക് ഇന് ചെയ്യുകയും, ശേഷം വിമാനം വൈകുകയും ചെയ്താല് യാത്രക്കാരന് നഷ്ടപരിഹാരം നല്കാന് എയര്ലൈന് ബാധ്യസ്ഥമാണ്. വിമാനം പുറപ്പെടുന്ന സഗയം വരെ യാത്രക്കാരന് സൗജന്യ ഭക്ഷണവും, ലഘുഭക്ഷണവും എയര്ലൈന് നല്കണം.
കാത്തിരിപ്പ് ക്രമീകരണങ്ങള്
ചില സാഹചര്യങ്ങളില് വിമാനത്തില് ലഭ്യമായ സീറ്റുകളിലും കൂടുതല് വിമാനക്കമ്പനികള് ബുക്കിംഗുകള് എടുക്കാറുണ്ട്. ഇത്തരം കേസില് സീറ്റുകളുടെ ലഭ്യതക്കുറവ് പല യാത്രക്കാരെയും വിമാനത്തില് കയറുന്നതില് നിന്ന് വിലക്കുന്നു. പക്ഷെ ഇവിടെ തെറ്റ് യാത്രക്കാരന്റെ ഭാഗത്തല്ല. അതിനാല് യാത്രക്കാരന് മറ്റൊരു വിമാനം ഒരുക്കുന്നതു വരെ എയര്ലൈന് കാത്തിരിപ്പ് ഉറപ്പാക്കണം.
ആഭ്യന്തര വിമാനം 6 മണിക്കൂറില് കൂടുതല് വൈകിയാല്
ഒരു എയര് സര്വീസ് 6 മണിക്കൂറില് കൂടുതല് വൈകുന്ന സാഹചര്യത്തില് ഷെഡ്യൂള്ട് സമയത്തിന് 24 മണിക്കൂര് മുമ്പ് അക്കാര്യം യാത്രക്കാരെ അറിയിക്കാന് വിമാനക്കമ്പനി ബാധ്യസ്ഥരാണ്. കൂടാതെ 6 മണിക്കൂറിനുള്ളില് യാത്രക്കാരന് മറ്റൊരു വിമാനം ക്രമീകരിക്കേണ്ടതുണ്ട്. ഇവി2െ യാത്രക്കാര് റീഫണ്ട് ആവശ്യപ്പെട്ടാല് മുഴുവന് തുകയും റീഫണ്ട് നല്കാന് കമ്പനി ബാധ്യസ്ഥമാണ്.
വിമാനം 24 മണിക്കൂറില് കൂടുതല് വൈകിയാല്
ഒരു വിമാന സര്വീസ് 24 മണിക്കൂറില് കൂടുതല് വൈകുന്ന പക്ഷം യാത്രക്കാരന് ഹോട്ടല് താമസവും, ഭക്ഷണവും എയര്ലൈന് സൗജന്യമായ ക്രമീകരിക്കേണ്ടതുണ്ട്. ഒരു രൂപ പോലും ഇതിനായി യാത്രക്കാരില് നിന്ന് ഈടാക്കരുതെന്ന് നിയമം പ്രത്യേകം പറയുന്നു. ഇനി രാത്രി 8 നും പുലര്ച്ചെ 3 നും ഇടയില് വിമാനം 6 മണിക്കൂറില് കൂടുതല് വൈകിയാലും ഇതേ നിയമങ്ങള് തന്നെ ബാധകമാകും.
വിമാനം റദ്ദാക്കിയാല്
ഇനി നിങ്ങള് യാത്ര ചെയ്യാനിരുന്ന സര്വീസ് റദ്ദാക്കിയാല് എന്തു സംഭവിക്കുമെന്ന് നോക്കാം. നിലവിലെ ഇന്ഡിഗോ പ്രതിസന്ധിയില് ഏതൊരു യാത്രക്കാരനും അറിഞ്ഞിരിക്കേണ്ട കാര്യമായി മാറുന്നു. കാരണം ദിവസങ്ങള്ക്കുള്ളില് ആയിരത്തിലേറെ സര്വീസുകള് റദ്ദാക്കപ്പെട്ടു. ഈ മാസം പകുതി വരെ സര്വീസുകള് ബാധിക്കപ്പെട്ടേക്കാമെന്നും വിലയിരുത്തപ്പെടുന്നു. വിമാനം റദ്ദാക്കുന്ന സാഹചര്യത്തില് എയര്ലൈന് യാത്രക്കാര്ക്ക് ഒരു ബദല് വിമാനം ക്രമീകരിക്കുകയും, മുഴുവന് തുകയും തിരികെ നല്കുകയും വേണം.
10,000 രൂപ വരെ കിട്ടും
ഇനി സര്വീസ് റദ്ദാക്കല് നടപടി വിമാനക്കമ്പനികള് യാത്രക്കാരെ കൃത്യസമയത്ത് അറിയിക്കാത്ത സാഹചര്യങ്ങളില് 10,000 രൂപ വരെ പിഴ ബാധകമാകും. കാലതാമസം കാരണം കണക്റ്റിംഗ് ഫ്ലൈറ്റ് നഷ്ടപ്പെട്ടാലുള്ള നഷ്ടപരിഹാരം നോക്കാം.
- 1 മണിക്കൂര് വൈകല്: 5000 രൂപ അല്ലെങ്കില് വണ്വേ നിരക്ക്
- 2 മണിക്കൂര് വൈകല്: 7500 രൂപ അല്ലെങ്കില് വണ്വേ നിരക്ക്
- 2 മണിക്കൂറില് കൂടുതല്: 10000 രൂപ അല്ലെങ്കില് വണ്വേ നിരക്ക്
വിമാന സര്വീസ് കാലതാമസം അല്ലെങ്കില് റദ്ദാക്കല് മൂലം നിങ്ങള്ക്കുണ്ടാകുന്ന ബുദ്ധിമുട്ടുകളും, അധിക ചെലവുകളും നഷ്ടപരിഹാരങ്ങള്ക്കോ, റീഫണ്ടുകള്ക്കോ ബാധകമാണ്. ഇക്കതരം കേസുകളില് നഷ്ടപരിഹാരം അല്ലെങ്കില് റീഫണ്ടിനായി ബുക്കിംഗ് സമയത്ത് നല്കിയ തിരിച്ചറിയല് രേഖ, യാത്രാ വിശദാംശങ്ങള്, ഹോട്ടല് താമസം- ഭക്ഷണ ബില്ലുകള് എന്നിവ ടിക്കറ്റുമായി ബന്ധപ്പെട്ട രേഖകള്ക്കൊപ്പം സമര്പ്പിക്കണം. നിങ്ങള് ടിക്കറ്റ് എടുത്തിരിക്കുന്നത് കറന്സി വഴി ആണെങ്കില് ഉടനടി റീഫണ്ട് ലഭിക്കും. ഇനി ക്രെഡിറ്റ് കാര്ഡ് വഴിയാണ് ഇടപാടെങ്കില് 7 ദിവസത്തിനുള്ളില് റീഫണ്ട് ലഭിക്കും. ഒരു ട്രാവല് ഏജന്റ് വഴിയാണ് നിങ്ങള് ടിക്കറ്റ് ബുക്ക് ചെയ്തതെങ്കില് റീഫണ്ടും ഏജന്റിന്റെ ഉത്തരവാദിത്തമാണ്.
നഷ്ട പരിഹാരം അല്ലെങ്കില് റിഫണ്ട് നടപടികള് വിമാനക്കമ്പനികള് മനഃപ്പൂര്വ്വം വൈകിപ്പിക്കുന്നുവെന്ന ആക്ഷേപം ശക്തമായതോടെ വിഷയത്തില് ഡിജിസിഎ ഇടപെട്ടിട്ടുണ്ട്. പുതിയ ഡിജിസിഎ ചട്ടങ്ങള് അനുസരിച്ച് 30 ദിവസത്തിനുള്ളില് റീഫണ്ടുകള് നല്കിയിരിക്കണം. ഇത് സംഭവിക്കാത്ത പക്ഷം കമ്പനികള് അധിക പിഴകള്ക്ക് വിധേയമാകും. ഇതു സംഭവിക്കാത്ത പക്ഷം യാത്രക്കാര്ക്ക് വ്യോമയാന മന്ത്രാലയത്തിന്റെ എയര് സര്വീസസ് പോര്ട്ടലില് പരാതി നല്കാം.
