Kerala Times Bureau
Californium> കാലിഫോര്ണിയ എന്നു നിങ്ങള് കേട്ടിരിക്കും. എന്നാല് കാലിഫോര്ണിയം എന്നു കേട്ടിട്ടുണ്ടോ? ലോകത്തെ ഏറ്റവും മൂല്യമേറിയ ലോഹങ്ങളില് ഒന്നാണ് കാലിഫോര്ണിയം. ഒരു ഗ്രാം കാലിഫോര്ണിയം വാങ്ങുന്ന പണത്തിന് നിങ്ങള്ക്ക് 200 കിലോ സ്വര്ണ്ണം മേടിക്കാന് സാധിക്കുമെന്ന് റിപ്പോര്ട്ടുകള് വ്യക്തമാക്കുന്നു. ഭൂമിയില് അപൂര്വ്വങ്ങളില് അപൂര്വ്വമായാണ് കാലിഫോര്ണിയം ഉള്ളത്.
നിഗൂഢ കാലിഫോര്ണിയം?
‘Cf’ എന്ന ചിഹ്നത്തിലാണ് കാലിഫോര്ണിയം അറിയപ്പെടുന്നത്. ഇതൊരു കൃത്രിമ റേഡിയോ ആക്ടീവ് രാസ മൂലകമാണ്. 1950 ല് ബെര്ക്ക്ലിയിലെ കാലിഫോര്ണിയ സര്വകലാശാലയിലെ ശാസ്ത്രജ്ഞരാണ് ഇത് ആദ്യമായി കണ്ടെത്തിയത്. അതിനാലാണ് ഇത് കാലിഫോര്ണിയം എന്ന പേരില് അറിയപ്പെടുന്നത്. വളരെ അപൂര്വവും, വിലയേറിയതുമായ ലോഹങ്ങളില് വളരെ മുന്നിലാണ് കാലിഫോര്ണിയം. ആന്റിമാറ്ററിനോളം തന്നെ പ്രധാന്യമുണ്ട് കാലിഫോര്ണിയത്തിനും.
ഭൂമിയില് ഇല്ല?
എന്തുകൊണ്ട് കാലിഫോര്ണിയം ഇത്ര വിലമതിക്കുന്നുവെന്ന് ചോദിച്ചാല് അതിന് ഉത്തരം അതിന്റെ ഉപയോഗവും, ലഭ്യതക്കുറവും തന്നെ. കാലിഫോര്ണിയം ഭൂമിയില് ഖനനം ചെയ്യപ്പെടുന്നില്ല. നൂതനമായ ന്യൂക്ലിയര് പ്രക്രിയകളിലൂടെയാണ് ഇതു സൃഷ്ടിക്കപ്പെടുന്നത്. കൃത്രിമമായി സൃഷ്ടിക്കപ്പെടുന്ന ഈ മൂലകം അത്രമേല് സൂക്ഷ്മതയോടെ കൈകാര്യം ചെയ്യേണ്ട ഒന്നാണ്.
നിയന്ത്രിത സാഹചര്യങ്ങളില് ന്യൂക്ലിയര് റിയാക്ടറുകളിലാണ് കാലഫോര്ണിയം ഉല്പ്പാദിപ്പിക്കപ്പെടുന്നത്. അപ്പോള് തന്നെ ഇവ എത്രമാത്രം അപകടക്കാരിയാണെന്ന് നിങ്ങള്ക്ക് മനസിലായല്ലേ? ഈ പ്രക്രിയയില് മറ്റ് മൂലകങ്ങളെ ന്യൂട്രോണുകള് ഉപയോഗിച്ച് ദീര്ഘകാലത്തേക്ക് നിയന്ത്രണത്തില് വയ്ക്കുന്നു. ഇത് ഉല്പ്പാദനം മന്ദഗതിയിലാക്കുകയും, പ്രയാസകരമാക്കുകയും, വളരെ ചെലവേറിയതുമാക്കി തീര്ക്കുന്നു.
വില എങ്ങനെ?
റിപ്പോര്ട്ടുകള് പ്രകാരം ഒരു ഗ്രാം കാലിഫോര്ണിയത്തിന് ഏകദേശം 27 ദശലക്ഷം യുഎസ് ഡോളര് വിലവരും. അതായത് ഏകദേശം 239 കോടി രൂപ. നിലവില് ഒരു കിലോഗ്രാം സ്വര്ണ്ണത്തിന് ഏകദേശം 1.2 കോടി രൂപയാണ്. അങ്ങനെ വരുമ്പോള് ഒരു ഗ്രാം കാലിഫോര്ണിയം വാങ്ങുന്ന വിലയ്ക്ക് ഏകദേശം 200 കിലോഗ്രാം സ്വര്ണ്ണം വാങ്ങാന് കഴിയും.
കാലിഫോര്ണിയത്തിന്റെ ഉപയോഗങ്ങള്
ആണവ വ്യവസായത്തിലാണ് കാലിഫോര്ണിയം ഏറ്റവും കൂടുതല് ഉപയോഗിക്കപ്പെടുന്നത്. ഇതൊരു ശക്തമായ ന്യൂട്രോണ് സ്രോതസായി പ്രവര്ത്തിക്കുന്നു. ന്യൂക്ലിയര് റിയാക്ടറുകള് ആരംഭിക്കാന് സഹായിക്കുകയും, ആണവോര്ജ്ജ ഗവേഷണത്തെ പിന്തുണയ്ക്കുകയും ചെയ്യുന്നു. വൈദ്യശാസ്ത്ര മേഖലയിലും കാലിഫോര്ണിയത്തിന് വന് സാധ്യതകളുണ്ട്. ന്യൂട്രോണ് തെറാപ്പി എന്നറിയപ്പെടുന്ന ഒരു പ്രത്യേക ക്യാന്സര് ചികിത്സയ്ക്ക് ഇവ ഉപയോഗിക്കുന്നു. കാലിഫോര്ണിയം-252 ഗ്രേഡാണ് ഇവിടെ ഉപയോഗിക്കപ്പെടുന്നത്. ക്യാന്സര് കോശങ്ങളെ കൃത്യതയോടെ നശിപ്പിക്കാന് ഇതിനു സാധിക്കും. പരമ്പരാഗത റേഡിയേഷന് തെറാപ്പി ഫലപ്രദമല്ലാത്ത സന്ദര്ഭങ്ങളിലാണ് ഇതു നിര്ദേശിക്കുപ്പെടുന്നത്. ചെലവ് അത്രമേല് കൂടുതലാണ്.
ബഹിരാകാശ പര്യവേക്ഷണം, വ്യാവസായിക പരിശോധന, ആഭ്യന്തര സുരക്ഷ എന്നിവയിലും കാലിഫോര്ണിയം ഉപയോഗിക്കപ്പെടുന്നു. മറഞ്ഞിരിക്കുന്ന ആണവ വസ്തുക്കള് കണ്ടെത്തുന്നതിനും, ലോഹഘടനകള് പരിശോധിക്കുന്നതിനും, നൂതന ശാസ്ത്ര പരീക്ഷണങ്ങളെ പിന്തുണയ്ക്കുന്നതിനും കാലിഫോര്ണിയത്തിനു കഴിയും.
