Kerala Times Bureau
Manappuram Finance> കേരളം ആസ്ഥാനമായുള്ള സ്വർണ്ണപ്പണയ വായ്പാ ഭീമൻ മണപ്പുറം ഫിനാൻസിന് സ്റ്റോക്ക് മാർക്കറ്റിൽ തിരിച്ചടി. ആഗോള നിക്ഷേപക കമ്പനിയായ ബെയ്ൻ ക്യാപിറ്റൽ (Bain Capital) മണപ്പുറം ഫിനാൻസിന്റെ ഓഹരികൾ വാങ്ങാനൊരുങ്ങുന്ന നീക്കത്തിന് റിസർവ് ബാങ്ക് ഓഫ് ഇന്ത്യ (RBI) തടസ്സവാദങ്ങൾ ഉന്നയിച്ചതോടെ ഓഹരി വിപണിയിൽ കമ്പനിയുടെ മൂല്യം കൂപ്പുകുത്തി.
ഓഹരികളിൽ കനത്ത തകർച്ച
കഴിഞ്ഞ വെള്ളിയാഴ്ച വ്യാപാരം തുടങ്ങിയപ്പോൾ തന്നെ മണപ്പുറം ഫിനാൻസിന്റെ ഓഹരികൾ ഏകദേശം 10% തകർച്ച നേരിട്ട് 278.55 രൂപ എന്ന താഴ്ന്ന നിലവാരത്തിലേക്ക് എത്തിയിരുന്നു. ബിസിനസ് ടുഡേ ഉൾപ്പെടെയുള്ള പ്രമുഖ മാധ്യമങ്ങൾ റിപ്പോർട്ട് ചെയ്യുന്നത് പ്രകാരം, ബെയ്ൻ ക്യാപിറ്റലിന്റെ ഈ ഏറ്റെടുക്കൽ നീക്കം നിലവിലെ ബാങ്കിംഗ് നിയമങ്ങൾക്കും റെഗുലേറ്ററി മാനദണ്ഡങ്ങൾക്കും വിരുദ്ധമാകാൻ സാധ്യതയുണ്ടെന്നാണ് ആർബിഐയുടെ നിരീക്ഷണം.
എന്താണ് സംഭവം?
ബെയ്ൻ ക്യാപിറ്റലിന് ഇന്ത്യയിലെ മറ്റൊരു പ്രമുഖ നോൺ-ബാങ്കിംഗ് ഫിനാൻഷ്യൽ കമ്പനിയായ (NBFC) ‘ടൈഗർ ക്യാപിറ്റലിൽ’ (Tyger Capital) ഇപ്പോൾ തന്നെ 93 ശതമാനം ഓഹരി പങ്കാളിത്തമുണ്ട്. മുമ്പ് അദാനി ക്യാപിറ്റൽ എന്ന് അറിയപ്പെട്ടിരുന്ന സ്ഥാപനമാണിത്. ഒരേ നിക്ഷേപകൻ തന്നെ ഒന്നിലധികം വായ്പാ സ്ഥാപനങ്ങളിൽ നിയന്ത്രണാധികാരം കൈയ്യാളുന്നത് റിസർവ് ബാങ്ക് പ്രോത്സാഹിപ്പിക്കാറില്ല.
മണപ്പുറം ഫിനാൻസിന്റെ 18 ശതമാനം ഓഹരികൾ നേരിട്ട് വാങ്ങാനും പിന്നീട് ഓപ്പൺ ഓഫറിലൂടെ 26 ശതമാനം കൂടി സ്വന്തമാക്കാനും ആയിരുന്നു ബെയ്ൻ ക്യാപിറ്റലിന്റെ പദ്ധതി. ഒരു നിക്ഷേപകന് ഒരേസമയം രണ്ട് ധനകാര്യ സ്ഥാപനങ്ങളിൽ വലിയ സ്വാധീനം ചെലുത്താൻ കഴിയുന്ന സാഹചര്യം ഒഴിവാക്കാനാണ് ആർബിഐ ശ്രമിക്കുന്നത്.
മുമ്പിലുള്ളത് അനിശ്ചിതത്ത്വം
ഏതാണ്ട് 4,400 കോടി രൂപയുടെ ഈ വമ്പൻ ഇടപാട് നടന്നാൽ മണപ്പുറം ഫിനാൻസിന്റെ നിലവിലെ പ്രൊമോട്ടർമാരായ വി.പി. നന്ദകുമാർ, സുഷമ നന്ദകുമാർ എന്നിവർക്കൊപ്പം ബെയ്ൻ ക്യാപിറ്റലും കമ്പനിയുടെ പ്രധാന പങ്കാളികളായി മാറുമായിരുന്നു. എന്നാൽ ആർബിഐയുടെ കർശന നിലപാട് വന്നതോടെ ഈ നീക്കം അനിശ്ചിതത്വത്തിലായിരിക്കുകയാണ്. ഇത് സംബന്ധിച്ച ഔദ്യോഗികമായ പ്രതികരണം മണപ്പുറം ഫിനാൻസിൽ നിന്നോ ആർബിഐയിൽ നിന്നോ ഇനിയും ലഭ്യമായിട്ടില്ലെങ്കിലും വാർത്തകൾ പുറത്തുവന്നതോടെ നിക്ഷേപകർ വലിയ രീതിയിലുള്ള വിറ്റഴിക്കലിന് തയ്യാറായതാണ് ഓഹരി വില താഴാൻ കാരണമെന്ന് അനലിസ്റ്റുകൾ ചൂണ്ടിക്കാട്ടുന്നു.
പ്രതീക്ഷകൾ ഇങ്ങനെ…
ഈ പ്രതിസന്ധി മറികടക്കാൻ ബെയ്ൻ ക്യാപിറ്റൽ തങ്ങളുടെ പക്കലുള്ള ടൈഗർ ക്യാപിറ്റലിന്റെ ഓഹരികൾ ഘട്ടംഘട്ടമായി വിറ്റൊഴിയാൻ ആലോചിക്കുന്നതായി റിപ്പോർട്ടുകളുണ്ട്. ആർബിഐയുടെ ആശങ്കകൾ പരിഹരിച്ചു കൊണ്ട് മണപ്പുറം ഡീൽ എങ്ങനെയെങ്കിലും മുന്നോട്ട് കൊണ്ടുപോകാനാണ് ശ്രമം. എന്നാൽ ഈ പ്രക്രിയയ്ക്ക് എത്രത്തോളം സമയമെടുക്കും എന്ന കാര്യത്തിൽ വ്യക്തതയില്ല. സ്വർണ്ണപ്പണയ വിപണിയിൽ മുത്തൂറ്റ് ഫിനാൻസ് ഉൾപ്പെടെയുള്ള കമ്പനികളുമായി കടുത്ത മത്സരം നേരിടുന്ന സമയത്താണ് മണപ്പുറം ഫിനാൻസിന് തിരിച്ചടിയുണ്ടായത്.
ഓഹരി വില
വെള്ളിയാഴ്ച്ച വിപണി ക്ലോസ് ചെയ്തപ്പോഴേക്കും മണപ്പുറം ഫിനാൻസ് ഓഹരികൾ നേരിയ തിരിച്ചുകയറ്റം നടത്തി. 7.64% ഇടിവ് നേരിട്ട് 285.85 രൂപ എന്ന നിലയിലാണ് ഓഹരികൾ എൻ.എസ്.യിൽ വ്യാപാരം അവസാനിപ്പിച്ചത്. ബി.എസ്.ഇയിൽ 7.80% താഴ്ച്ചയിൽ 285.20 രൂപയാണ് ക്ലോസിങ് നടന്നത്. വരും ദിവസങ്ങളിൽ, ആർബിഐ എടുക്കുന്ന അന്തിമ തീരുമാനവും കമ്പനിയുടെ ഔദ്യോഗിക വിശദീകരണവുമായിരിക്കും ഓഹരിയുടെ ഭാവി നിശ്ചയിക്കുക. മണപ്പുറം ഫിനാൻസിൽ നിക്ഷേപമുള്ളവർ ഈ നീക്കങ്ങൾ കൃത്യമായി നിരീക്ഷിക്കേണ്ടതാണെന്ന് അനലിസ്റ്റുകൾ നിർദ്ദേശിക്കുന്നു.
