കൊച്ചി കോസ്റ്റ് ഗാർഡ് ആസ്ഥാനത്തിന് സമീപം ഡ്രോണുകൾ ; രണ്ട് അമേരിക്കൻ വിനോദസഞ്ചാരികൾ അറസ്റ്റിൽ

കൊച്ചി > കൊച്ചി കോസ്റ്റ് ഗാർഡ് ആസ്ഥാനത്തിന് സമീപം ഡ്രോണുകൾ പറത്തിയ സംഭവത്തിൽ രണ്ട് അമേരിക്കൻ വിനോദസഞ്ചാരികൾ അറസ്റ്റിൽ. നിയന്ത്രിത പ്രദേശത്ത് ഡ്രോൺ പറത്തുകയും വീഡിയോ പകർത്തുകയും ചെയ്തതിന് ഇവർക്കെതിരെ കേസെടുത്തിട്ടുണ്ട്. വിമാന നിയമപ്രകാരവും ഡ്രോൺ നിയന്ത്രണങ്ങൾ പ്രകാരവും ആണ് കേസടുത്തത്.

ഫോർട്ട് കൊച്ചിയിലെ കോസ്റ്റ് ഗാർഡ് ആസ്ഥാനത്തിന് സമീപം ഡ്രോണുകൾ പറത്തുന്നത് കർശനമായി നിരോധിച്ചിരിക്കുന്നതുമാണ്.   ഈ പ്രദേശം റെഡ് സോണിൽ വരുന്നതും പ്രധാനപ്പെട്ട നാവിക, കോസ്റ്റ് ഗാർഡ് പ്രവർത്തനങ്ങൾക്ക് ആതിഥേയത്വം വഹിക്കുന്നതുമാണ്. പോലീസ് പറയുന്നതനുസരിച്ച്, യുഎസിലെ കാലിഫോർണിയയിൽ നിന്നുള്ള രണ്ട് വിനോദസഞ്ചാരികളായ കാറ്റി മിഷേൽ ഫെൽപ്‌സും ക്രിസ്റ്റഫർ റോസ് ഹാർവിയും ശനിയാഴ്ച രാവിലെ ഈ നിയന്ത്രിത പ്രദേശത്ത് ഡ്രോൺ പറത്തി വീഡിയോ റെക്കോർഡ് ചെയ്യുകയായിരുന്നു.

ഇക്കാര്യം ശ്രദ്ധയിൽപ്പെട്ട  അവിടെയുണ്ടായിരുന്ന പോലീസ് ഇരുവരെയും ഉടൻ തന്നെ കസ്റ്റഡിയിലെടുത്തു. അന്വേഷണത്തിൽ ഇരുവരും വിനോദസഞ്ചാരികളായി വന്നതാണെന്നും ഈ പ്രദേശത്ത് ഡ്രോൺ പറത്തുന്നതിനുള്ള നിരോധനത്തെക്കുറിച്ച് അവർക്ക് അറിയില്ലായിരുന്നുവെന്നും കണ്ടെത്തി. തുടർന്ന് ഇവരുടെ ഡ്രോണും ലാപ്‌ടോപ്പും കണ്ടുകെട്ടി. നോട്ടീസ് നൽകിയ ശേഷം ഇരുവരെയും വിട്ടയച്ചെങ്കിലും കൂടുതൽ അന്വേഷണത്തിനായി പോലീസിന് മുന്നിൽ ഹാജരാകേണ്ടിവരും.