Kerala Times Bureau
Financial Changes from November 01 – പുതിയ മാസത്തിൽ, 2025 നവംബർ മുതൽ സാമ്പത്തികവുമായി ബന്ധപ്പെട്ട് പല മാറ്റങ്ങളും നടപ്പാവുകയാണ്. ബാങ്ക് കസ്റ്റമേഴ്സ്, ക്രെഡിറ്റ് കാർഡ് ഉപയോക്താക്കൾ, കേന്ദ്ര സർക്കാർ ജീവനക്കാർ എന്നിവരെയെല്ലാം ബാധിക്കുന്ന അത്തരം ചില പുതിയ മാറ്റങ്ങളെക്കുറിച്ചാണ് ഇവിടെ വിശദമാക്കുന്നത്.
1. ബാങ്കിങ് റൂൾ മാറ്റങ്ങൾ
2025 നവംബർ 01 മുതൽ നോമിനേഷനുമായി ബന്ധപ്പെട്ടാണ് പ്രധാന മാറ്റങ്ങൾ നടപ്പാകുന്നത്. സിഗിംൾ അക്കൗണ്ട്, ലോക്കർ, സേഫ് കസ്റ്റഡി ഐറ്റം എന്നിവയുമായി ബന്ധപ്പെട്ട് നാല് വ്യക്തികളെ വരെ ഉപയോക്താക്കൾക്ക് നോമിനേറ്റ് ചെയ്യാം. എമർജൻസി സമയങ്ങളിൾ കൂടുതൽ എളുപ്പത്തിൽ ഫണ്ട് പിൻവലിക്കാൻ അടക്കം സഹായകമായ മാറ്റമാണിത്. നോമിനികളെ ആഡ് ചെയ്യുക, മാറ്റുക തുടങ്ങിയവയുമായി ബന്ധപ്പെട്ട നടപടിക്രമങ്ങളും കൂടുതൽ ലഭിതമാക്കിയിട്ടുണ്ട്. ഇത് പിന്നീടുള്ള നിയമപരമായ സങ്കീർണതകൾ ഒഴിവാക്കാനും സഹായിക്കും.
2. ക്രെഡിറ്റ് കാർഡ് & പേയ്മെന്റ് ചാർജ്ജുകൾ
ക്രെഡിറ്റ് കാർഡ് സംബന്ധമായ ചില പേയ്മെന്റുകളുടെ ചാർജ്ജുകളിലും മാറ്റം വരും. തേർഡ് പാർട്ടി ആപ്ലിക്കേഷനുകൾ വഴിയുള്ള വിദ്യാഭ്യാസ സംബന്ധമായ പേയ്മെന്റുകൾക്ക് ഇനി മുതൽ 1% ഫീസ് നൽകേണ്ടി വരും. 1,000 രൂപയിലധികമുള്ള വാലറ്റ് ടോപ് അപ്പുകൾക്കും സമാനമായ ചാർജ്ജ് ബാധകമാണ്. ഉപയോക്താക്കൾ തങ്ങളുടെ ബാങ്കുമായി ബന്ധപ്പെട്ട് അപ്ഡേറ്റ് ചെയ്ത ഫീസ് ഘടന പരിശോധിക്കേണ്ടതാണ്
3. ആധാർ അപ്ഡേറ്റ്സ്
യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ പുതിയ മാറ്റങ്ങൾ നടപ്പാക്കുന്നു. പൗരന്മാർക്ക് തങ്ങളുടെ ആധാറിലെ പേര്, ജനനത്തിയ്യതി, മൊബൈൽ നമ്പർ എന്നിവ അനുബന്ധ രേഖകളില്ലാതെ ഓൺലൈനായി അപ്ഡേറ്റ് ചെയ്യാം. അതേ സമയം ഫിംഗർ പ്രിന്റ്, ഐറിസ് സ്കാൻ അടക്കമുള്ള ബയോമെട്രിക് അപ്ഡേറ്റുകൾക്ക് ഒരു ആധാർ സെന്റർ നേരിട്ട് സന്ദർശിക്കേണ്ടതാണ്. നോൺ ബയോമെട്രിക് അപ്ഡേറ്റുകൾക്ക് 75 രൂപയും, ബയോമെട്രിക് അപ്ഡേറ്റുകൾക്ക് 125 രൂപയുമാണ് പുതിയ ഫീസ്.
4. പെൻഷൻ അപ്ഡേറ്റുകൾ
കേന്ദ്ര സർവീസിൽ നിന്ന് വിരമിച്ച പെൻഷൻകാരെ സംബന്ധിച്ച് നവംബർ മാസം പ്രധാനമാണ്. വിരമിച്ചവർ തങ്ങളുടെ ആനുവൽ ലൈഫ് സർട്ടിഫിക്കറ്റ്, നവംബർ 1ാം തിയ്യതിക്കും 30നും ഇടയിൽ സമർപ്പിക്കേണ്ടതാണ്. കൃത്യസമയത്ത് പെൻഷൻ ലഭിക്കാൻ ഇത് ആവശ്യമാണ്. നാഷണൽ പെൻഷൻ സിസ്റ്റത്തിൽ (NPS) നിന്ന് യുണിഫൈഡ് പെൻഷൻ സ്കീമിലേക്ക് (UPS) സ്വിച്ച് ചെയ്യുന്നതിനുള്ള സമയപരിധി 2025 നവംബർ 30 വരെ ദീർഘിപ്പിച്ചിട്ടുണ്ട്.
5. ജി.എസ്.ടി സിസ്റ്റം
ജി.എസ്.ടിയിലും പുതിയ മാസത്തിൽ ചില മാറ്റങ്ങളുണ്ട്. നവംബർ 01 മുതൽ ബിസിനസുകൾ ലളിതമായ രജിസ്ട്രേഷൻ നടപടിക്രമങ്ങളാണ് പിന്തുടരേണ്ടത്. ജി.എസ്.ടി പരിഷ്ക്കരണത്തിന് ശേഷം 5,18 എന്നിങ്ങനെ രണ്ട് പ്രധാന ടാക്സ് സ്ലാബുകളാണ് ഇന്ത്യയിൽ നിലവിലുള്ളത്. ലക്ഷ്വറി-സിൻ ഗുഡ്സിന് 40% പ്രത്യേക സ്ലാബും നിലവിലുണ്ട്.
