Kerala Times Bureau
Post Office Scheme> നിങ്ങള് ഒരു ശരാശരി മനുഷ്യന് ആണോ? സമ്പാദിക്കുന്ന കാലത്ത് റിട്ടയര്മെന്റിനെ പറ്റി മറന്നോ? എങ്കില് അത്തരക്കാര്ക്കുള്ള ഒരു അതുല്യ സര്ക്കാര് നിക്ഷേപ പദ്ധതിയെ പറ്റിയാണ് ഇന്നു പറയുന്നത്. ഈ നിക്ഷേപ പദ്ധതി ശരിയായ രീതിയില് വിനിയോഗിച്ചാല് 61,500 രൂപ വരെ പലിശ നേടാനാകും. പറഞ്ഞു വരുന്നത് സര്ക്കാരിന്റെ സീനിയര് സിറ്റിസണ്സ് സേവിംഗ്സ് സ്കീമിനെ (SCSS) പറ്റിയാണ്.
സംയുക്ത നിക്ഷേപം വന് നേട്ടം
ഇതൊരു ഒറ്റത്തവണ നിക്ഷേപ പദ്ധതിയാണ്. അതിനാല് തന്നെ വലിയൊരു തുക നിക്ഷേപിക്കേണ്ടി വരും. അതിനാല് തന്നെ നിങ്ങളുടെ റിട്ടയര്മെന്റ് ബെനഫിറ്റ്സ് (പിഎഫ്, ഗ്രാറ്റുവിറ്റി തുടങ്ങിയവ) ഇതിനായി ഉപയോഗപ്പെടുത്തുക. അതുപോലെ തന്നെ മികച്ച നേട്ടത്തിനായി ഇവിടെ നിങ്ങള് ഭാര്യയ്ക്കൊപ്പം ഒരു സംയുക്ത നിക്ഷേപം ആരംഭിക്കുന്നതാണ് നല്ലത്.
മികച്ച പലിശ വരുമാനം
സര്ക്കാര് പദ്ധതി ആയതിനാല് തന്നെ ഇതൊരു റിസ്ക് രഹിത നിക്ഷേപ പദ്ധതിയാണ്. പലിശയിലെ ഏറ്റക്കുറച്ചിലുകള് മാത്രമാണ് ശ്രദ്ധിക്കേണ്ടത്. ഈ പദ്ധതി പാദടിസ്ഥാനത്തിലാണ് പലിശ നല്കുന്നത്. നിലവിലെ സാഹചര്യത്തില് നിങ്ങള് ഭാര്യയ്ക്കൊപ്പം പദ്ധതിയില് 30 ലക്ഷം രൂപ നിക്ഷേപിച്ചാല് മൂന്നു മാസം കൂടുമ്പോള് ഏകദേശം 61,500 രൂപ പലിശ പോക്കറ്റിലെത്തും.
സീനിയര് സിറ്റിസണ്സ് സേവിംഗ്സ് സ്കീം
ഇന്ത്യ പോസ്റ്റ് വാഗ്ദാനം ചെയ്യുന്ന അതുല്യ നിക്ഷേപ പദ്ധതികളില് ഒന്നാണിത്. സമ്പാദിക്കുന്ന സമയത്ത് റിട്ടയര്മെന്റ് നിക്ഷേപങ്ങളെ പറ്റി മറന്നവര്ക്ക് ഈ ഒറ്റത്തവണ നിക്ഷേപ പദ്ധതി ഒരു മുതല്ക്കൂട്ടാണ്. പദ്ധതി 5 വര്ഷം കാലാവധിയോടെയാണ് വരുന്നത്. ഏറ്റവും കുറഞ്ഞ നിക്ഷേപ പരിധി 1,000 രൂപയും, കൂടിയ പരിധി 30 ലക്ഷം രൂപയുമാണ്. പലിശ വരുമാനം നികുതി ബാധകമാണെങ്കിലും, ആദായനികുതി നിയമം സെക്ഷന് 80സിയുടെ ആനുകൂല്യങ്ങള് ലഭിക്കും.
പലിശ എപ്പോള്?
ഈ സര്ക്കാര് പദ്ധതി ത്രൈമാസാടിസ്ഥാനത്തിലാണു പലിശ വരവുവയ്ക്കുന്നത്. റിപ്പോര്ട്ടുകള് പ്രകാരം മാര്ച്ച് 31, ജൂണ് 30, സെപ്റ്റംബര് 30, ഡിസംബര് 31 എന്നീ തീയതികളില് പലിശ അക്കൗണ്ടിലെത്തും. ഈ പലിശ നിങ്ങളുടെ പോസ്റ്റ് ഓഫീസ് സേവിംഗ്സ് അക്കൗണ്ടിലേക്ക് ഓട്ടോ ക്രെഡിറ്റാകുന്ന തരത്തിലാണ് ഡിസൈന് ചെയ്തിരിക്കുന്നത്.
അറിയേണ്ട കാര്യങ്ങള്
60 വയസോ, അതില് കൂടുതലോ പ്രായമുള്ള പൗരന്മാര്ക്ക് മാത്രമേ ഈ പദ്ധതിയില് അംഗമാകാന് കഴിയൂ. അതേസമയം സര്ക്കാര് സര്വീസില് നിന്ന് വിആര്എസ് എടുക്കുന്ന ജീവനക്കാര്ക്ക് 55 വയസു മുതല് പദ്ധതി ഉപയോഗപ്പെടുത്താം. പ്രതിരോധ ജീവനക്കാര്ക്ക് 50 വയസു മുതല് തന്നെ പദ്ധതിയില് അംഗമാകാം. നിക്ഷേപകര്ക്ക് അവരുടെ പങ്കാളികള്ക്കൊപ്പം സംയുക്ത നിക്ഷേപത്തിനു കീഴില് 30 ലക്ഷം രൂപ വരെ നിക്ഷേപിക്കാന് കഴിയും.
61,500 രൂപ പലിശ
30 ലക്ഷം രൂപയുടെ സംയുക്ത നിക്ഷേപമാണ് നിങ്ങള്ക്ക് 61,500 രൂപയോളം പലിശ നേടിത്തരിക. അങ്ങനെ വരുമ്പോള് 5 വര്ഷത്തില് നിങ്ങളുടെ പലിശ വരുമാനം മാത്രം ഏകദേശം 12,30,000 രൂപ ആയിരിക്കും. കാലാവധി പൂര്ത്തിയാകുമ്പോള് നിങ്ങളുടെ പ്രിന്സിപ്പല് തുകയും തിരികെ ലഭിക്കും.
