Kerala Times Bureau
New Labour Code – പുതിയ ലേബർ കോഡുകൾ രാജ്യത്ത് നിലവിൽ വന്നിരിക്കുകയാണ്. എന്നാൽ ഇതുമായി ബന്ധപ്പെട്ട് വൻ തോതിൽ ഊഹാപോഹങ്ങളും, ആശങ്കകളുമൊക്കെ ഉണ്ടാവുകയും ചെയ്തു. ജോലി ചെയ്ത് കയ്യിൽ കിട്ടുന്ന ശമ്പളത്തിൽ കുറവുണ്ടാകുമോ എന്നതായിരുന്നു സാധാരണക്കാരുടെയടക്കം ആശങ്ക. എന്നാൽ ഈ വിഷയത്തിൽ ഇപ്പോൾ കേന്ദ്ര തൊഴിൽ മന്ത്രാലയം വ്യക്തത വരുത്തിയിട്ടുണ്ട്. പുതിയ ലേബർ കോഡുകൾ കാരണം കയ്യിൽക്കിട്ടുന്ന ശമ്പളത്തിൽ കുറവു വരില്ല എന്നാണ് അറിയിച്ചിരിക്കുന്നത്. പ്രൊവിഡന്റ് ഫണ്ട് ഡിഡക്ഷൻസ് 15,000 രൂപയെന്ന പരിധിയിൽ തുടർന്നും കണക്കാക്കുന്നിടത്തോളം വേതനത്തിൽ കുറവുണ്ടാവുകയില്ല. ഇത് രാജ്യത്തെ വലിയൊരു വിഭാഗം ജീവനക്കാർക്ക് ആശ്വാസം പകരുന്ന അറിയിപ്പ് കൂടിയാണ്.
തൊഴിൽ മന്ത്രാലയത്തിന്റെ ട്വീറ്റ്
ട്വിറ്ററിലൂടെയാണ് കേന്ദ്ര തൊഴിൽ മന്ത്രാലയം ഇക്കാര്യം അറിയിച്ചത്. ‘ശമ്പളത്തിന്റെ സീലിങ് പ്രകാരം പി.എഫ് ഡിഡക്ഷനുകൾ നടക്കുന്നതിനാൽ, പുതിയ ലേബർ കോഡുകൾ കയ്യിൽക്കിട്ടുന്ന വേതനത്തിൽ കുറവു വരുത്തുകയില്ല. പി.എഫ് വിഹിതം 15,000 രൂപയെന്ന ശമ്പള പരിധിയിലാണ് കണക്കാക്കുന്നത്. ഇതിൽക്കൂടുതലുള്ള പി.എഫ് വിഹിതം വോളന്ററിയാണ്, നിർബന്ധിതമല്ല. ജീവനക്കാരൻ, തൊഴിലുടമ എന്നിവർ പരസ്പര സമ്മതത്തോടെ 15,000 രൂപയെന്ന നിയമാനുസൃത പരിധിയിൽ കൂടുതൽ തുക പി.എഫ് വിഹിതം നൽകാനും സാധിക്കും’ – മന്ത്രാലയം അറിയിച്ചു.
എന്തുകൊണ്ട് ആശയക്കുഴപ്പം?
പുതിയ ലേബർ കോഡുകൾ പ്രകാരം അടിസ്ഥാന ശമ്പളം, അനുബന്ധ നിരക്കുകൾ എന്നിവ ആകെ ശമ്പളത്തിന്റെ കുറഞ്ഞത് 50 ശതമാനമെങ്കിലും ആയിരിക്കണമെന്ന് പുതിയ ലേബർ കോഡുകൾ അനുശാസിക്കുന്നു. ഇതോടെ ഈ നിബന്ധന, ഓട്ടോമാറ്റിക്കായി പി.എഫ് വിഹിതം ഉയർത്തുമെന്നും, കയ്യിൽക്കിട്ടുന്ന ശമ്പളത്തിൽ കുറവു വരുത്തുമെന്നും പലരും കണക്കു കൂട്ടി. എന്നാൽ, ശമ്പളത്തിൽ കുറവു വരാൻ ഒരു സാഹചര്യമാണുള്ളതെന്ന് നിങ്ങൾ മനസ്സിലാക്കുക. ജീവനക്കാരനും, തൊഴിലുടമയും വോളന്ററിയായി 15,000 രൂപയിൽ കൂടുതലുള്ള വരുമാനത്തിന്റെ പി.എഫ് വിഹിതം ഒരുമിച്ച് കണക്കു കൂട്ടാൻ തീരുമാനിച്ചാലാണ് ഇങ്ങനെ സംഭവിക്കുക. എന്നാൽ ഇത് ഓപ്ഷണലായ കാര്യമാണ്, നിർബന്ധിതമായ ഒന്നല്ല.
പുതിയ ലേബർ കോഡുകൾ
കാലഹരണപ്പെട്ട തൊഴിൽ നിയമങ്ങളിൽ പൊളിച്ചെഴുത്ത് നടത്തിയാണ് രാജ്യത്ത് പുതിയ സമഗ്രമായ ലേബർ കോഡുകൾ നടപ്പാക്കിയത്. താഴെ പറയുന്ന നാല് ലേബർ കോഡുകളാണ് 2025 നവംബർ 21 മുതൽ നിലവിൽ വന്നത്
1. കോഡ് ഓൺ വെയ്ജസ്
2. ഇൻഡസ്ട്രിയൽ റിലേഷൻസ് കോഡ്
3. കോഡ് ഓൺ സോഷ്യൽ സെക്യൂരിറ്റി
4. ഒക്യുപ്പേഷണൽ സേഫ്റ്റി, ഹെൽത്ത് & വർക്കിങ് കണ്ടീഷൻസ് കോഡ്
