രാവിലെ വെറുംവയറ്റിൽ ഇവ കഴിക്കാറുണ്ടോ? എങ്കിൽ നിങ്ങൾ അറിഞ്ഞിരിക്കേണ്ട ഒരു അപകടമുണ്ട്

നമ്മുടെ ഒരു ദിവസം എത്രത്തോളം ഊർജ്ജസ്വലമായിരിക്കണം എന്നത് തീരുമാനിക്കുന്നത് നമ്മൾ രാവിലെ ഉണർന്ന് വെറുംവയറ്റിൽ വയറിലേക്ക് എത്തിക്കുന്ന ആദ്യത്തെ ആഹാരമാണ്. ആരോഗ്യകരമെന്ന് നമ്മൾ കരുതുന്ന പല ഭക്ഷണങ്ങളും വെറുംവയറ്റിൽ കഴിക്കുമ്പോൾ യഥാർത്ഥത്തിൽ ശരീരത്തിന് ‘വിഷമായി’ മാറാറുണ്ട്. പ്രമുഖ ഗ്യാസ്‌ട്രോ എൻട്രോളജിസ്റ്റായ ഡോ. ശുഭം വത്സ്യയുടെ അഭിപ്രായത്തിൽ, പണ്ട് മുതലേ നമ്മൾ ശീലിച്ചുപോരുന്ന പല പ്രഭാത ഭക്ഷണരീതികളും നമ്മുടെ ദഹനവ്യവസ്ഥയെ തകർക്കുന്നവയാണ്.

രാവിലെ എഴുന്നേറ്റയുടൻ ഒരു കപ്പ് ചായയോ കാപ്പിയോ കുടിക്കുന്നത് ആശ്വാസമായി തോന്നുമെങ്കിലും, അത് നിങ്ങളുടെ ആമാശയത്തിലെ ആസിഡ് നില തെറ്റിക്കുമെന്നതാണ് സത്യം. വെറുംവയറ്റിൽ കഴിക്കാൻ പാടില്ലാത്ത 3 പ്രധാന ആഹാരങ്ങളെക്കുറിച്ചും അവ ഒഴിവാക്കേണ്ടതിന്റെ കാരണങ്ങളെക്കുറിച്ചും താഴെ വിശദമായി വായിക്കാം.

1.കഫീനും സിട്രസ് പാനീയങ്ങളും (ചായ, കാപ്പി, നാരങ്ങാവെള്ളം)
ഭൂരിഭാഗം മലയാളികളുടെയും പ്രഭാതം തുടങ്ങുന്നത് ഒരു കപ്പ് ചായയിലോ കാപ്പിയിലോ ആണ്. എന്നാൽ വെറും വയറ്റിൽ കഫീൻ ഉള്ളിലെത്തുന്നത് ആമാശയ ഭിത്തികളെ പ്രകോപിപ്പിക്കുകയും ഹൈഡ്രോക്ലോറിക് ആസിഡിന്റെ ഉൽപ്പാദനം അമിതമായി വർദ്ധിപ്പിക്കുകയും ചെയ്യും. ഇത് കാലക്രമേണ വിട്ടുമാറാത്ത അസിഡിറ്റിക്കും അൾസറിനും കാരണമാകുന്നു. അതുപോലെ തന്നെ വൈറ്റമിൻ സി അടങ്ങിയ നാരങ്ങാവെള്ളം പോലുള്ള പാനീയങ്ങൾ വെറുംവയറ്റിൽ കുടിക്കുന്നത് വയറിൽ എരിച്ചിലും ഗ്യാസും ഉണ്ടാക്കാൻ സാധ്യതയുണ്ട്.

2.ഫ്രൂട്ട് സ്മൂത്തികളും മിൽക്ക് ഷേക്കുകളും
പഴങ്ങളും പാലും ചേർത്ത സ്മൂത്തികൾ ഒരു ‘ഹെൽത്തി ബ്രേക്ക്ഫാസ്റ്റ്’ ആണെന്ന ധാരണ പലർക്കുമുണ്ട്. എന്നാൽ ഡോക്ടറുടെ അഭിപ്രായത്തിൽ, വെറുംവയറ്റിൽ പാൽ ഉൽപ്പന്നങ്ങളും മധുരമുള്ള പഴങ്ങളും ചേർത്ത് കഴിക്കുന്നത് ദഹനപ്രക്രിയയെ മന്ദഗതിയിലാക്കും. ഇത് വയർ വീർക്കുന്നതിനും (Bloating), ആ ദിവസം മുഴുവൻ ഒരുതരം മടുപ്പ് അനുഭവപ്പെടുന്നതിനും കാരണമാകും. പഴങ്ങൾ കഴിക്കാൻ ആഗ്രഹമുണ്ടെങ്കിൽ പ്രഭാതഭക്ഷണത്തിന് ശേഷമുള്ള ഇടവേളകളിൽ അവ ഉൾപ്പെടുത്തുന്നതാണ് ഉചിതം.

3.വേവിക്കാത്ത പച്ചക്കറി
ശരീരഭാരം കുറയ്ക്കാൻ ആഗ്രഹിക്കുന്നവർ രാവിലെ തന്നെ പച്ചക്കറി സാലഡുകൾ കഴിക്കാറുണ്ട്. എന്നാൽ പച്ചക്കറികളിലെ ‘Raw Fiber’ അഥവാ ലയിക്കാത്ത നാരുകൾ ദഹിപ്പിക്കാൻ വെറും വയറിന് വലിയ അധ്വാനം ആവശ്യമാണ്. ഇത് കുടലിൽ വേദനയും അസ്വസ്ഥതയും ഉണ്ടാക്കാം. പച്ചക്കറികൾ എപ്പോഴും വേവിച്ചോ അല്ലെങ്കിൽ ഉച്ചഭക്ഷണത്തിന്റെ കൂടെയോ കഴിക്കുന്നതാണ് ഉത്തമം.

പരിഹാരം എന്താണ്?
ഈ ഭക്ഷണങ്ങൾ പൂർണ്ണമായും ഒഴിവാക്കണമെന്നല്ല, മറിച്ച് അവ കഴിക്കുന്ന ക്രമം മാറ്റണമെന്നാണ് വിദഗ്ധർ പറയുന്നത്. രാവിലെ എഴുന്നേറ്റാലുടൻ ഒരു ഗ്ലാസ് ചെറുചൂടുവെള്ളം കുടിക്കുന്നതാണ് ഏറ്റവും നല്ല ശീലം. അതിനുശേഷം ലഘുവായതും ദഹിക്കാൻ എളുപ്പമുള്ളതുമായ ഭക്ഷണങ്ങൾ കഴിച്ചുകൊണ്ട് നമ്മുടെ ദഹനവ്യവസ്ഥയെ സജ്ജമാക്കാം.