Kerala Times Bureau
FREE Cooking Gas Worth Rs 500> ഇറാന്- ഇസ്രായേല് യുദ്ധം ഇനി എത്രനാള് നീളുമെന്ന കാര്യത്തില് വലിയ പിടിയില്ല. അതേസമയം ഇന്ത്യയ്ക്ക് ഹോര്മുസ് കടലിടുക്ക് ഉപയോഗിക്കാന് ഇറാന് അനുമതി നല്കിയത് വലിയ ആശ്വാസമാണ്. ഹോര്മുസ് കടലിടുക്കിലെ യാത്രാ പ്രശ്നമാണ് രാജ്യത്തെ എല്പിജി പ്രതിസന്ധിക്ക് കാരണമെന്നാണ് പലരും വിശ്വസിക്കുന്നത്. ഹോര്മുസ് തുറന്നതോടെ എല്ലാം ശരിയായെന്നാണ് നിങ്ങളുടെ ധാരണയെങ്കില് നിങ്ങള്ക്ക് തെറ്റി. കൂടുതല് അറിയാം.
ഹോര്മുസ് ഇന്ത്യയിലേയ്ക്ക് എല്പിജി എത്തുന്ന പ്രധാന ജലപാതയാണ്. ഇത് ഇന്ത്യയ്ക്ക മുന്നില് തുറക്കുന്നത് വലിയ ആശ്വാസമാണ്. എന്നാല് ഇന്ത്യയ്ക്ക് എല്പിജി നല്കുന്ന ഗള്ഫ് മേഖല ഇറാന് ആക്രമണത്തിലാണ്. പല കമ്പനികളും അവരുടെ എണ്ണ- വാതക പ്ലാന്റുകള് അടച്ചിരിക്കുകയാണ്. ഉല്പ്പാദനം ഇല്ലാതെ ജലപാത മാത്രം തുറന്നതുകൊണ്ട് വലിയ കാര്യമില്ല. ഈ സാഹചര്യത്തിലാണ് സര്ക്കാരിന്റെ പിഎന്ജി നീക്കം.
സര്ക്കാരിന്റെ പിഎന്ജി തന്ത്രം
എല്പിജി സിലിണ്ടറുകളുടെ ക്ഷാമം നേരിടാനായി ഉപയോക്താക്കളോട് പൈപ്പ് നാച്ചുറല് ഗ്യാസ് (പിഎന്ജി) കണക്ഷനുകളിലേയ്ക്ക് മാറാനാണ് സര്ക്കാര് നിര്ദേശം. സര്ക്കാര് തന്നെ മുന്കൈ എടുത്തതോടെ ഉപയോക്താക്കളെ ആകര്ഷിക്കാന് വമ്പന് ഓഫറുകളാമായി വിതരണ കമ്പനികളും രംഗത്തെത്തിയിട്ടുണ്ട്. എല്പിജിയില് നിന്ന് പിഎന്ജിയിലേയ്ക്ക് മാറാന് ഉപയോക്താക്കള്ക്ക് കമ്പനികള്ക്ക് മെയില് അയയ്ക്കുകയോ, ഔദ്യോഗിക പോര്ട്ടലില് അഭ്യര്ത്ഥന ഉന്നയിക്കുകയോ ചെയ്യാമെന്ന് പെട്രോളിയം, പ്രകൃതി വാതക മന്ത്രാലയത്തിലെ ജോയിന്റ് സെക്രട്ടറി (മാര്ക്കറ്റിംഗ് & ഓയില് റിഫൈനറി) സുജാത ശര്മ്മ തന്നെ വ്യക്തമാക്കിയിട്ടുണ്ട്.
കമ്പനികളുടെ ഓഫറുകള്
സര്ക്കാര് തന്നെ പ്രോല്സാഹിപ്പിക്കുമ്പോള് പിന്നെ കമ്പനികള് വെറുതേയിരിക്കുമോ? ഉപയോക്താക്കളെ ആകര്ഷിക്കാന് വന് ഓഫറുകളാണ് അവര് നല്കുന്നത്. ഡല്ഹി- എന്സിആറില് സേവനങ്ങള് നല്കുന്ന ഇന്ദ്രപ്രസ്ഥ ഗ്യാസ് ലിമിറ്റഡ് (ഐജിഎല്), എല്പിജിയില് നിന്ന് പിഎന്ജി കണക്ഷനുകളിലേക്ക് മാറുന്ന ഗാര്ഹിക ഉപഭോക്താക്കള്ക്ക് 500 രൂപയുടെ സൗജന്യ ഗ്യാസ് ആണ് വാദ്ഗാദനം ചെയ്തിരിക്കുന്നത്. എല്പിജി ക്ഷാമം നേരിടുന്ന സമയത്താണ് ഈ ഓഫര് എന്നതു കാണാതെ പോകരുത്. മാര്ച്ച് 31 ന് മുമ്പ് പിഎന്ജി കണക്ഷനുകള്ക്ക് അപേക്ഷിക്കുന്ന ഉപഭോക്താക്കള്ക്കാകും ഈ ഓഫര് ലഭിക്കുക. മഹാനഗര് ഗ്യാസ് ലിമിറ്റഡ് (എംജിഎല്) പുതിയ ഗാര്ഹിക പിഎന്ജി കണക്ഷനുള്ള 500 രൂപ രജിസ്ട്രേഷന് ചാര്ജ് ഒഴിവാക്കി. വാണിജ്യ കണക്ഷനുകള്ക്കുള്ള ഒരു ലക്ഷം മുതല് 5 ലക്ഷം രൂപ വരെയുള്ള സെക്യൂരിറ്റി ഡെപ്പോസിറ്റും ഒഴിവാക്കിയിട്ടുണ്ട്.
കേരളത്തില് കൊച്ചിയില് അടക്കം പ്രവര്ത്തനമുള്ള ഗെയില് ഇന്ത്യ പുതിയ പിഎന്ജി കണക്ഷനുകള്ക്ക് 500 രൂപയുടെ സൗജന്യ ഗ്യാസ് വാഗ്ദാനം ചെയ്തിട്ടുണ്ട്. പഒതിയ വാണിജ്യ പിഎന്ജി കണക്ഷനുകള്ക്കുള്ള സെക്യൂരിറ്റി ഡെപ്പോസിറ്റ് ബിപിസിഎല്ലും കുത്തനെ കുറച്ചിട്ടുണ്ട്.
