Kerala Times Bureau
നിലവിൽ പുതിയ ഒരു എ.ഐ മോഡൽ ഇന്ത്യയടക്കമുള്ള രാജ്യങ്ങളിലെ ഫിനാൻസ് സെക്ടറിൽ ആശങ്ക പടർത്തുന്നു. ‘ Claude Mythos ‘ എന്ന എ.ഐ മോഡൽ സൈബർ സുരക്ഷയുമായി ബന്ധപ്പെട്ടാണ് ഭീതി ഉണർത്തുന്നത്. ഇന്ത്യൻ ധനകാര്യ മന്ത്രി നിർമലാ സീതാരാമൻ , ജപ്പാനിലെ സാമ്പത്തിക വിദ്ഗ്ധർ എന്നിവർ ഇത് സംബന്ധിച്ച് ബാങ്കുകൾക്ക് അടിയന്തിര ജാഗ്രതാ നിർദ്ദേശം നൽകിക്കഴിഞ്ഞു. നിലവിലെ സാഹചര്യത്തിൽ നിങ്ങളുടെ ബാങ്ക് ബാലൻസ് സുരക്ഷിതമാണോ എന്നതടക്കം മനസ്സിലാക്കാം.
ആശങ്കകൾക്ക് കാരണം
പുതിയ എ.ഐ മോഡൽ സുരക്ഷ സംബന്ധിച്ച വിടവുകൾ കണ്ടെത്തുമെന്നതാണ് ഏറ്റവും വലിയ പ്രശ്നം. സോഫ്റ്റ് വെയർ ഡെവലപ്പർമാർക്ക് ധാരണയില്ലാത്ത സുരക്ഷാ വിടവുകൾ ഈ എ.ഐ കണ്ടെത്തും. ടെസ്റ്റിങ്ങിനിടെ തന്നെ ബാങ്കിങ് സംവിധാനത്തിലെയും, ഓപ്പറേറ്റിങ് സിസ്റ്റത്തിലെയും പിഴവുകൾ Claude Mythos കണ്ടെത്തിയിട്ടുണ്ട്. തെറ്റായ കരങ്ങളിൽ എത്തിച്ചേർന്നാൽ മിനിറ്റുകൾക്കകം ആഗോള ബാങ്കിങ് ഇൻഫ്രാസ്ട്രക്ചർ തന്നെ തകർക്കാൻ ശേഷിയുള്ള എ.ഐ മോഡലാണിത്.
ഇന്ത്യ, ജപ്പാൻ എന്നീ രാജ്യങ്ങളിലെ മിക്ക ബാങ്കുകളും താരതമ്യേന പഴയ സാങ്കേതിക വിദ്യ അധിഷ്ഠിതമാക്കിയാണ് പ്രവർത്തിക്കുന്നത്. ഇവയിലേക്ക് ആധുനിക എ.ഐ ടൂളുകൾ ഉപയോഗിച്ച് കടന്നു കയറാൻ സാധിച്ചേക്കും. ആന്ത്രോപിക് ഇതു വരെ ഈ മോഡൽ പൊതുജനങ്ങൾക്കായി ലഭ്യമാക്കിയിട്ടില്ല. ചില അൺ ഓതറൈസ്ഡ് ഗ്രൂപ്പുകൾക്ക് ഈ എ.ഐ ആക്സിസ് ലഭിച്ചുവെന്ന റിപ്പോർട്ടുകൾ ഇന്ത്യയേയും ആശങ്കപ്പെടുത്താൻ പോന്നതാണ്.
വേറിട്ട ഭീഷണി
പരമ്പരാഗത സൈബർ ആക്രമണങ്ങളിൽ സെക്യൂരിറ്റീ ടീമുകൾക്ക് പ്രതികരിക്കാൻ സമയം ലഭ്യമായിരുന്നു. അതേ സമയം എ.ഐ അധിഷ്ഠിത ആക്രമണങ്ങൾ പൊടുന്നനെയാണ് നടക്കുക. എ.ഐ സാങ്കേതിക വിദ്യയുടെ കരുത്തുള്ള സൈബർ ആക്രമണങ്ങൾ അതിവേഗത്തിലായതിനാൽ മനുഷ്യർക്ക് ഇത് സമാനമായ വേഗതയിൽ ഫിക്സ് ചെയ്യുക ഏറെക്കുറെ അസാധ്യമാണ്. ഇന്ത്യയിൽ നിലവിൽ കോടിക്കണക്കിന് ആളുകളാണ് ഡിജിറ്റൽ ബാങ്കിങ് സേവനങ്ങൾ ഉപയോഗിക്കുന്നത്. എ.ഐ അധിഷ്ഠിത ആക്രമണങ്ങൾ തടയാൻ പല സംവിധാനങ്ങളും പര്യാപ്തവുമല്ല.
പുതിയ എ.ഐ ഭീഷണിയുമായി ബന്ധപ്പെട്ട് കേന്ദ്ര ധനമന്ത്രി നിർമലാ സീതാരാമന്റെ നേതൃത്ത്വത്തിൽ ഉന്നത തലയോഗം ചേർന്നു കഴിഞ്ഞു. നിർമലാ സീതാരാമൻ, കേന്ദ്ര ഐ.ടി മന്ത്രി അശ്വിനി വൈഷ്ണവ് എന്നിവർ പുതിയ ഭീഷണി സംബന്ധിച്ച് ബാങ്കുകൾക്ക് അടിയന്തിര മുന്നറിയിപ്പ് നൽകിയിട്ടുണ്ട്. കേന്ദ്ര സർക്കാർ സൈബർ സെക്യൂരിറ്റി പ്രോട്ടോക്കോൾ പുനർനിർവചിക്കുകയുമാണ്. ഈ പ്രത്യേക ഭീഷണി നേരിടുന്നതിനായി ജപ്പാൻ പുതിയ സ്പെഷ്യലൈസ്ഡ് ടാസ്ക് ഫോഴ്സിന് നേതൃത്ത്വം നൽകിയിട്ടുണ്ട്.
എന്താണ് Claude Mythos?
ഒരു ജീനിയസ് ഹെൽപർ എന്ന നിലയിൽ ഡിസൈൻ ചെയ്ത് രൂപപ്പെടുത്തിയ എ.ഐ മോഡലാണ് Claude Mythos. അതേ സമയം ലോകത്തെ തന്നെ ഏറ്റവും സുരക്ഷിതമായ ബാങ്കിങ് സംവിധാനങ്ങൾ തകർക്കാൻ ഇതിന് ശേഷിയുണ്ടെന്നാണ് വിദഗ്ധർ ഇപ്പോൾ ഭയപ്പെടുന്നത്. യു.എസ് ആസ്ഥാനമായ ആന്ത്രോപിക് എന്ന കമ്പനി ഡെവലപ് ചെയ്ത എ.ഐ മോഡലാണിത്. നിലവിൽ സാധാരണ ഉപയോഗിക്കുന്ന എ.ഐ മോഡലുകളേക്കാൾ സങ്കീർണമാണിത്. ഹൈ സ്പെഷ്യലൈസ്ഡ് എൻജിൻ എന്ന നിലയിലാണ് ഇത് ഡിസൈൻചെയ്തിരിക്കുന്നത്.
സങ്കീർണമായ കോഡിങ്ങുകൾ, സൈബർ സെക്യൂരിറ്റി ടാസ്കുകൾ എന്നിവ നിറവേറ്റും വിധമാണ് രൂപകല്പന. ഗ്ലോബൽ ഫിനാൻഷ്യൽ സിസ്റ്റത്തെ തന്നെ താറുമാറാക്കാൻ ശേഷിയുണ്ടെന്ന ഭയത്താൽ ഇത് പൊതുജനങ്ങൾക്കായി റിലീസ് ചെയ്യാൻ ആന്ത്രോപിക് തയ്യാറായിട്ടില്ല. ഈ സാങ്കേതിക വിദ്യയുടെ വേഗത, കൃത്യത എന്നിവയാണ് ഇന്ത്യ, ജപ്പാൻ എന്നീ രാജ്യങ്ങളെയടക്കം ഭയപ്പെടുത്തുന്നത്. ടെസ്റ്റിങ്ങിനിടെ ആയിരക്കണക്കിന് ‘Zero-Day’ സുരക്ഷാ പിഴവുകൾ Claude Mythos കണ്ടെത്തിക്കഴിഞ്ഞു. ഇത്തരം പിഴവുകൾ നില നിൽക്കുന്നതായി യഥാർത്ഥ സോഫ്റ്റ് വെയർ ഡെവലപ്പർമാർക്കു പോലും അറിവില്ലായിരുന്നു എന്നതാണ് ശ്രദ്ധേയം. ഇത്തരത്തിൽ ഒരു ടെസ്റ്റിങ്ങിൽ 27 വർഷമായി ഓപ്പറേറ്റിങ് സിസ്റ്റത്തിൽ മറഞ്ഞു കിടന്ന ഒരു Bug പോലും കണ്ടെത്തുകയുണ്ടായി.
നിങ്ങളുടെ ബാങ്ക് ബാലൻസ് സുരക്ഷിതമോ?
നിങ്ങളുടെ ബാങ്കിലെ പണം സുരക്ഷിതമാണ്. 2026 ഏപ്രിൽ 23ാം തിയ്യതി നടന്ന യോഗത്തിന് ശേഷം ഇന്ത്യയിലെ ഫിനാൻഷ്യൽ സിസ്റ്റം നിലവിൽ സുരക്ഷിതമാണെന്ന് നിർമലാ സീതാരാമൻ പറഞ്ഞു. അതേ സമയം മനുഷ്യർ കണ്ടെത്തുന്ന പഴയ രീതിയിലുള്ള സുരക്ഷാ രീതികൾ മാറ്റാൻ സമയമായെന്നും അവർ പറഞ്ഞു. സുരക്ഷ വർധിപ്പിക്കുന്നതിന്റെ ഭാഗമായി ഇന്ത്യൻ ബാങ്ക്സ് അസോസിയേഷൻ, ഒരു റിയൽ ടൈം ഇന്റലിജൻസ് ഷെയറിങ് സിസ്റ്റം സർക്കാരിന്റെ സൈബർ സെക്യൂരിറ്റി ഏജൻസിയായ CERT-In ചേർന്ന് വികസിപ്പിക്കും. ഒരു എ.ഐ അധിഷ്ഠിത ആക്രമണം അവ ആരംഭിക്കുന്നതിന് മുമ്പ് തന്നെ ബ്ലോക്ക് ചെയ്യാൻ സാധിക്കുന്ന സങ്കേതം വികസിപ്പിക്കാനാണ് ശ്രമം.
നിലവിൽ ‘Project Glasswing’ എന്ന കർശനമായ പ്രോഗ്രാമിന് കീഴിൽ പുതിയ എ,ഐ മോഡൽ ആന്ത്രോപിക് സംരക്ഷിച്ചിരിക്കുയാണ്. കമ്പനിയുടെ ചുരുക്കം ചില പങ്കാളികൾക്ക് ഡിഫൻസീവ് ആയ ആവശ്യങ്ങൾക്ക് മാത്രമാണ് ഇത് ഉപയോഗിക്കാൻ സാധിക്കുക. എന്നാൽ ഈ മോഡൽ ഹാക്കർ ഗ്രൂപ്പുകളുടെ കൈവശം എത്തുമോ എന്നതാണ് ആശങ്ക. ഇപ്പോൾത്തന്നെ ചില അൺ ഓതറൈസ്ഡ് ഗ്രൂപ്പുകൾക്ക് Claude Mythos മോഡലിന്റെ പരിമിതമായ ആക്സിസ് ലഭിച്ചു എന്ന വാർത്തയാണ് ഭീതിക്ക് നിദാനം.
