Kerala Times Bureau
Indian Dual Stealth Drone Rama> ലോകത്തെ ആദ്യത്തെ ഡ്യുവല് സ്റ്റെല്ത്ത് ഡ്രോണുുമായി ഇന്ത്യ എത്തുന്നു. അതും തദ്ദേശിയ കരുത്തില്. ഒക്ടോബറില് ആരംഭിക്കുന്ന ഇന്ത്യയുടെ ‘കോള്ഡ് സ്റ്റാര്ട്ട്’ സൈനികാഭ്യാസം ആഗോള ശ്രദ്ധ നേടുന്നു. ഡ്രോണുകളും, കൗണ്ടര്- ഡ്രോണ് സംവിധാനങ്ങളും പരീക്ഷിക്കും.
Cold Start Military Exercise പ്രതിരോധ മേഖലയില് ഇന്ത്യ ആഗോള ശ്രദ്ധ ആകര്ഷിക്കുന്നത് തുടരുന്നു. ഓപ്പറേഷന് സിന്ദൂറിന് ശേഷം പ്രതിരോധ മേഖലയില് ഇന്ത്യയുടെ മുഖം തന്നെ മാറിയിട്ടുണ്ട്. റിപ്പോര്ട്ടുകള് പ്രകാരം ഒക്ടോബര് ആദ്യ വാരത്തില് ഇന്ത്യ ‘കോള്ഡ് സ്റ്റാര്ട്ട്’ എന്ന പേരില് ഒരു പ്രധാന സൈനികാഭ്യാസം നടത്താന് പദ്ധതിയിടുന്നു. ഡ്രോണുകളുടെയും, കൗണ്ടര്- ഡ്രോണ് സംവിധാനങ്ങളുടെയും പരീക്ഷണം ആയിരിക്കും പ്രധാനം.
എന്തുകൊണ്ട് കോള്ഡ് സ്റ്റാര്ട്ട്?
മാറുന്ന കാലത്ത് യുദ്ധമുഖത്ത് വ്യോമ സംവിധാനങ്ങള്ക്കുള്ള പ്രധാന്യം കഴിഞ്ഞ കുറച്ച യുദ്ധങ്ങളായി ലോകം മനസിലാക്കിയതാണ്. നമ്മുടെ വ്യോമ പ്രതിരോധ സംവിധാനത്തിന്റെ ശക്തി മനസിലാക്കുന്നതിനും, മെച്ചപ്പെടുത്താനുമാണ് കോള്ഡ് സ്റ്റാര്ട്ട് പ്ലാന് ചെയ്തിരിക്കുന്നത്. വ്യോമ രംഗത്ത് പാകിസ്താന് ഇന്ത്യയെ അനുകരിക്കാന് ശ്രമിക്കുന്നുണ്ടെന്നും, അതിനാല് നമ്മള് എപ്പോഴും ഒരു പടി മുന്നില് നില്ക്കണമെന്നും എയര് മാര്ഷല് അശുതോഷ് ദീക്ഷിത് ഡല്ഹിയില് നടന്ന ‘Counter UAVs and Air Defense Systems’ എന്ന സമ്മേളനത്തില് പറഞ്ഞു.
ഡ്രോണുകളുടെ കാലം
ഇന്ത്യയുടെ ഡ്രോണുകളും, കൗണ്ടര് ഡ്രോണ് സംവിധാനങ്ങളും ഇതോടകം തന്നെ എത്രമാത്രം ശക്തമാണെന്ന് ഓപ്പറേഷന് സിന്ദൂറില് വ്യക്തമായതാണ്. അടുത്ത 5- 6 വര്ഷത്തിനുള്ളില് ഇന്ത്യയ്ക്ക് 10,000 -ത്തിലധികം ഡ്രോണുകള് ഉണ്ടാകുമെന്ന് എയര് മാര്ഷല് ദീക്ഷിത് പിഎച്ച്ഡി ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രി റിപ്പോര്ട്ടുകള് അടിസ്ഥാനമാക്കി പറഞ്ഞു. ഡ്രോണുകളും, അവയുടെ ഇന്റര്സെപ്ഷന് സാങ്കേതികവിദ്യകളും തമ്മിലുള്ള മത്സരമായിരിക്കും ഭാവിയില് യുദ്ധത്തിന്റെ ഭാവി തീരുമാനിക്കുക.
ശ്രദ്ധിക്കേണ്ടത് 3 കാര്യങ്ങള്
കൗണ്ടര്- ഡ്രോണ് സംവിധാനങ്ങളിലേയ്ക്ക് വരുമ്പോള് വിജയം മൂന്നു കാര്യങ്ങളെ ആശ്രയിച്ചിരിക്കുമെന്ന് ഡെപ്യൂട്ടി ചീഫ് ഓഫ് ഇന്റഗ്രേറ്റഡ് ഡിഫന്സ് സ്റ്റാഫ് (ഓപ്പറേഷന്സ്) രാകേഷ് സിന്ഹ പറഞ്ഞു. ഒന്ന്, ശത്രു ഡ്രോണുകളെ കൃത്യമായി തിരിച്ചറിയാനുള്ള കഴിവ്. രണ്ട്, ആര്ട്ടിഫിഷ്യല് ഇന്റലിജന്സിന്റെ സഹായത്തോടെ വേഗത്തിലും കൃത്യതയോടും പ്രതികരിക്കാനുള്ള ശേഷി, മൂന്ന്, നിലവിലുള്ള വ്യോമ പ്രതിരോധ സംവിധാനങ്ങളുമായി സുഗമമായി സംയോജിപ്പിക്കാനുള്ള കഴിവ്.
ഇന്ത്യയുടെ ‘രാമ’ വരുന്നു
യുഎസിന്റെ സ്റ്റെല്ത്ത് ജെറ്റുകളെ പറ്റി നിങ്ങള് കേട്ടിട്ടുണ്ടാകും. മറ്റു രാജ്യങ്ങള്ക്ക് ഒരു പേടിസ്വപ്നമാണ് ഈ ജെറ്റുകള്. ഒരു റഡാറിന്റെയും കണ്ണില് പെടാതെ് നിമിഷ നേരം കൊണ്ട് ലക്ഷ്യം നേടാനുള്ള കഴിവ് സ്റ്റെല്ത്ത് ജെറ്റുകള്ക്കുണ്ട്. ഇന്ത്യയും നിലവില് ഈ നേട്ടത്തിനുള്ള ശ്രമത്തിലാണ്. അതേസമയം ഇന്ത്യ എന്തെങ്കിലും ചെയ്യുമ്പോള് അത് അല്പം വ്യത്യസ്തമായിരിക്കണമല്ലോ? ഇവിടെയും കാര്യം അങ്ങനെ തന്നെയാണ് റിപ്പോര്ട്ടുകള് വ്യക്തമാക്കുന്നത്. ഇന്ത്യ ലക്ഷ്യം വയ്ക്കുന്നത് ഡ്യുവല് സ്റ്റെല്ത്ത് ഡ്രോണുകളാണ്. ലോകത്തിലെ ആദ്യത്തെ ഡ്യുവല് സ്റ്റെല്ത്ത് ഡ്രോണായിരിക്കും ഇന്ത്യയുടെ ‘രാമ’ എന്നാണു വിവരം.
തദ്ദേശിയ അത്ഭുതമാകും രാമ. ഇന്ത്യയുടെ ഈ പുതിയ കണ്ടുപിടിത്തം ലോകത്തിന് തന്നെ ഒരു അത്ഭുതമായിരിക്കും. ശത്രുവിന്റെ ഉയര്ന്ന റെസല്യൂഷന് റഡാറില് നിന്നും, ഇന്ഫ്രാറെഡ് സിഗ്നലുകളില് നിന്നും രാജ്യത്തെ കാക്കാന് രാമയ്ക്ക് സാധിക്കും. റഡാര്, ഇന്ഫ്രാറെഡ് ഡിറ്റക്ഷന് 97% വരെ കുറയ്ക്കുന്ന ഒരു അതുല്യമായ തദ്ദേശീയ കോട്ടിംഗ് മെറ്റീരിയലാകും രാമ ഉപയോഗിക്കുകയെന്ന് റിപ്പോര്ട്ടുകള് കൂട്ടിച്ചേര്ക്കുന്നു. ഹൈദരാബാദ് ആസ്ഥാനമായി പ്രവര്ത്തിക്കുന്ന സ്റ്റാര്ട്ടപ്പായ വീര ഡൈനാമിക്സും, ബിന്ഫോര്ഡ് റിസര്ച്ച് ലാബും ചേര്ന്നാണ് പ്രതിരോധ മന്ത്രാലയത്തിന്റെ പിന്തുണയോടെ ഈ ഡ്രോണ് വികസിപ്പിക്കുന്നത്. നിലവില് അമേരിക്ക, ചൈന, റഷ്യ എന്നിവര്ക്കു മാത്രമാണ് റഡാറിനെ കബളിപ്പിക്കുന്ന സ്റ്റെല്ത്ത് ഡ്രോണുകള് ഉള്ളത്.
