Kerala Times Bureau
JioFi Rs 299 Coroporate Plan> സൗജന്യങ്ങളും, ഓഫറുകളും കൊണ്ട് ഇന്ത്യന് ടെലികോം വിപണി പിടിച്ചടുക്കിയ സ്വകാര്യ ടെലികോം സേവനദാതാക്കള് കഴിഞ്ഞ ദിവസം പൊതുമേഖല സ്ഥാപനമായ ബിഎസ്എന്എല്ലിന്റെ ദീപാവലി ഓഫറുകള്ക്കെതിരേ രംഗത്തുവന്നിരുന്നു. ബിഎസ്എന്എല്ലിന്റെ 4ജി, 5ജി വ്യാപനവും, ബജറ്റ് പ്ലാനുകളും സ്വകാര്യ ടെലികോം കമ്പനികള്ക്ക് സൃഷ്ടിക്കുന്ന തലവേദന ചെറുതല്ല. ഇതിനിടെയാണ് ബിഎസ്എന്എല് ദീപാവലി ഓഫറായി പ്രതിദിനം 5 രൂപയില് താഴെ മാത്രം ചെലവ് വരുന്ന വാര്ഷിക പ്ലാനും, 1 രൂപ പ്ലാനുമൊക്കെ അവതരിപ്പിച്ചത്. ടെലികോം വിപണിയില് മത്സരങ്ങള് കടുത്തതോടെ നിലവില് കമ്പനികള് ബ്രോഡ്ബാന്ഡിലാന് ശ്രദ്ധ കേന്ദ്രീകരി്ച്ചിരിക്കുന്നത്.
ജിയോയുടെ അത്യുഗ്രന് ഓഫര്
ബിസിനസുകള്, പ്രൊഫഷണലുകള് എന്നിവരെ ആകര്ഷിക്കാനായി റിലയന്സ് ജിയോ അവതരിപ്പിച്ച പുതിയ കോര്പ്പറേറ്റ് ജിയോഫൈ പ്ലാന് ആണ് നിലവില് വിപണികളിലെ ചര്ച്ചവിഷയം. ഭാരതി എയര്ടെല്, ബിഎസ്എന്എല് എന്നിവരില് നിന്നുള്ള മത്സരം കടുത്തെന്ന് വ്യക്തമാക്കുന്നതാണ് പ്ലാന്. പ്രതിമാസം വെറും 299 എന്ന നിരക്കിലാണ് ഈ ബജറ്റ് കോര്പ്പറേറ്റ് പ്ലാന് അവതരിപ്പിച്ചിരിക്കുന്നത്.
ആകര്ഷകമായ ഓഫറുകള്
ജിയോയുടെ ബജറ്റ് പ്ലാനിനൊപ്പവും ആകര്ഷകമായ ഓഫറുകള് നിലനിര്ത്തിയിരിക്കുന്നുവെന്നതാണ് ഏറ്റവും ശ്രദ്ധേയമായ കാര്യം. വിപണികളിലെ മത്സരം എടുത്തുകാണിക്കുന്നതാണ് ഈ നടപടി. 299 രൂപയുടെ പ്രതിമാസ കോര്പ്പറേറ്റ് ജിയോഫൈ പ്ലാനിനൊപ്പം ഉപയോക്താക്കള്ക്ക് സൗജന്യ ജിയോഫൈ റൂട്ടര് ലഭിക്കും. കൂടാതെ 150 എംബിപിഎസ് വരെ വേഗവും ഈ പ്ലാന് വാഗ്ദാനം ചെയ്യുന്നു. ചെറുകിട ബിസിനസുകള്, സ്റ്റാര്ട്ടപ്പുകള്, പോര്ട്ടബിള്, സുരക്ഷിത ഇന്റര്നെറ്റിനെ ആശ്രയിക്കുന്ന റിമോട്ട് ജീവനക്കാര് എന്നിവരെയാണ് ഇന്ത്യയിലെ ഏറ്റവും വലിയ ടെലികോം ഓപ്പറേറ്ററായ റിലയന്സ് ജിയോ പുതിയ നീക്കത്തിലൂടെ ലക്ഷ്യംവയ്ക്കുന്നത്.
അപ്ലോഡിലും കേമന്
അതിംഗഭീര ഡൗണ്ലോഡ് സ്പീഡ് വാഗ്ദാനം ചെയ്യുമ്പോഴും ഇഴയുന്ന അപ്ലോഡ് സ്പീഡ് പല ബ്രോഡ്ബാന്ഡ് ഉപയോക്താക്കളുടെയും തലവേദനയാണ്. പ്രത്യേകിച്ച് വര്ക്ക് ഫ്രം ഹോം അല്ലേല് റിമോട്ട് പ്രവര്ത്തനങ്ങള് നടത്തുന്ന പ്രൊഫഷണലുകളെ ഈ കുറഞ്ഞ് അപ്ലോഡ് സ്പീഡ് ബാധിക്കാറുണ്ട്. എന്നാല് ജിയോയുടെ പുതിയ ബജറ്റ് കോര്പ്പറേറ്റ് പ്ലാന് 150 എംബിപിഎസ് ഡൗണ്ലോഡ് വേഗത്തിനൊപ്പം 50 എംബിപിഎസ് അപ്ലോഡ് സ്പീഡും വാഗ്ദാനം ചെയ്യുന്നു. ഓണ്ലൈന് മീറ്റിംഗുകള്, ഫയല് പങ്കിടല്, ദൈനംദിന ഓഫീസ് ജോലികള് എന്നിവയ്ക്കഎ ഏറ്റവും അനുയോജ്യമായിരിക്കും ഈ പ്ലാന്.
വൈദ്യുതി നിലച്ചാലും ഇന്റര്നെറ്റ് തുടരും
2300 എംഎഎച്ച് ബാറ്ററിയോട് കൂടിയ റൗട്ടറാണ് കോര്പ്പറേറ്റ് കണക്ഷനൊപ്പം വരുന്നത്. ഒറ്റ ചാര്ജില് ഏകദേശം ആറ് മണിക്കൂര് തുടര്ച്ചയായ ഉപയോഗം ഉറപ്പാക്കാന് ഇതിനു സാധിക്കുന്നു. അതായത് വൈദ്യുതി നിലച്ചാലും ബാറ്ററിയില് പ്രവര്ത്തിക്കാന് ഈ സംവിധാനത്തിനു കഴിയും. യാത്രകളിലും മറ്റും ഈ റൗട്ടര് നിങ്ങള്ക്ക് നേട്ടമാകും. പരിമിതമായ ബ്രോഡ്ബാന്ഡ് ആക്സസ് ഉള്ള പ്രദേശങ്ങളില് പോലും വിശ്വസനീയമായ 4ജി കണക്റ്റിവിറ്റിയില് ഒന്നിലധികം കണക്ഷനുകള് കൈകാര്യം ചെയ്യാന് പ്രാപ്തമാണ് ജിയോയുടെ ഈ ഓഫര്.
ശ്രദ്ധിക്കേണ്ട കാര്യങ്ങള്
കാര്യങ്ങള് ഇങ്ങനെയൊക്കെ ആണെങ്കിലും ഉയര്ന്ന ഡാറ്റ ആവശ്യമുള്ളവര്ക്ക് അനുയോജ്യമല്ല ഈ പ്ലാനുകള് എന്നു ശ്രദ്ധിക്കുക. കാരണം ഇവിടെ മാസം 35 ജിബി ഡാറ്റ മാത്രമാണ് ഉപഭോക്താവിന് ലഭിക്കുക. 35 ജിബിക്കു ശേഷം 64 കെബിപിഎസ് വേഗത്തിലാകും ഇന്റര്നെറ്റ് ലഭിക്കുക. പ്ലാന് ഉപയോഗിക്കാത്ത ഡാറ്റ (200 ജിബി വരെ) റോളോവര് ചെയ്യാന് അനുവദിക്കുന്നു. 10 ഡിവൈസുകള് വരെ ഒരേസമയം ഈ റൗട്ടറില് കണക്ട് ചെയ്യാം. 24 മാസത്തെ നിര്ബന്ധിത ലോക്ക് ഇന് പിരീഡ് ഈ കോര്പ്പറേറ്റ് പ്ലാനിനുണ്ട്.
മികച്ച ഡാറ്റ ആവശ്യമുള്ളവര് ജിയോ എയര് ഫൈബര്, അല്ലെങ്കില് ജിയോ ഫൈബര് കണക്ഷനുകള് എടുക്കുന്നതാണ് നല്ലത്. മാസം 2000 ജിബി ഡാറ്റ, സൗജന്യ റൗട്ടര്, ലൈവ് കേബിള് ടിവി, ഒടിടി ആക്സസ് എന്നിവ ഇവ നല്കുന്നു.
