Kerala Times Bureau
Bank Holiday> ബാങ്കിംഗ് സേവനങ്ങള് ഒരു രാജ്യത്തെ സംബന്ധിച്ച് എത്രമാത്രം പ്രധാന്യം അര്ഹിക്കുന്നുവെന്ന കാര്യം പ്രത്യേകം പറയേണ്ടതില്ലല്ലോ? രാജ്യം ബജറ്റ് ചൂടിലമരുമ്പോള് രാജ്യത്തെ ബാങ്കുകള് തുടര്ച്ചയായി 4 ദിവസം അടഞ്ഞുകിടക്കും. നീണ്ട ഇടവേളയ്ക്കു ശേഷമാണ് ഇത്തരം അടുപ്പിച്ചുള്ള അവധികള് എത്തുന്നത്. മാസാന്ത്യം ആയതിനാല് തന്നെ ആളുകള് ധനകാര്യങ്ങളില് അല്പം ജാഗ്രത പുലര്ത്തുന്നത് നല്ലതാണ്.
സൃഷ്ടിക്കപ്പെട്ട അവധി
മൊത്തം നാലു ദിവസമാണ് ബാങ്കിംഗ് സേവനങ്ങള് തടസപ്പെടുന്നത്. ഇതില് 3 അവധികള് സ്വാഭാവികമാണ്. എന്നാല് ഒന്ന് സൃഷ്ടിക്കപ്പെട്ടതാണ്. അതും സര്ക്കാരിനെ സമ്മര്ദത്തിലാക്കാനുള്ള നീക്കം. ബാങ്കിംഗ് സേവനങ്ങള് ആഴ്ചയില് 5 ദിവസമായി പരിമിതപ്പെടുത്തണമെന്ന് ആവശ്യപ്പെട്ട് ബാങ്ക് ജീവനക്കാര് പ്രഖ്യാപിച്ചിരിക്കുന്ന പണിമുടക്കിനെ പറ്റിയാണ് പറഞ്ഞത്. 2026 ജനുവരി 27, ചൊവാഴ്ചയാണ് എല്ലാ ബാങ്ക് ജീവനക്കാരുടെയും സംയുക്ത ഫോറമായ യുണൈറ്റഡ് ഫോറം ഓഫ് ബാങ്ക് യൂണിയന്സ് (UFBU) പ്രഖ്യാപിച്ചിരിക്കുന്ന ഈ പണിമുടക്ക്.
മൊത്തം നാലു ദിവസം സേവനങ്ങള് മുടങ്ങും
പണിമുടക്ക് രാജ്യത്തെ പൊതു, സ്വകാര്യ മേഖലാ ബാങ്കുകളുടെ പ്രവര്ത്തനത്തെ ബാധിക്കുമെന്നാണ് വിവരം. പണിമുടക്കിനായി സംഘടന തെരഞ്ഞെടുത്ത ദിവസമാണ് ഇതില് ഏറ്റവും ശ്രദ്ധേയം. 2026 ജനുവരി 24 മാസത്തെ 4 -ാമത്തെ ശനിയാഴ്ച ആയതിനാല് തന്നെ ബാങ്കുകള് പ്രവര്ത്തിക്കില്ല. ജനുവരി 25 ഞായര് ആണ്. ജനുവരി 26 തിങ്കള് രാജ്യം റിപ്പബ്ലിക് ദിനം ആഘോഷിക്കുന്നു. അതിനാല് തന്നെ അവധിയാണ്. ഇതിനു പിറ്റേ ദിവസം അതായത് ജനുവരി 27നാണ് ബാങ്ക് യൂണിയന്റെ പണിമുടക്ക്. ബാങ്കുകളുടെ പ്രവര്ത്തനം തിങ്കള് മുതല് വെള്ളി വരെയായി നിശ്ചയിക്കണമെന്നതാണ് ഇവരുടെ ആവശ്യം.
എടിഎമ്മും, യുപിഐയും ചതിച്ചേക്കാം
തുടര്ച്ചയായ അവധികള് എടിഎം, യുപിഐ സേവനങ്ങളെ സാരമായി ബാധിച്ചേക്കാം. അതിനാല് കാര്യങ്ങള് ഉപയോക്താക്കള് മുന്കൂട്ടി പ്ലാന് ചെയ്യുക. ഈ അവധികള് രാജ്യവ്യാപകമായതിനാല് തന്നെ ആഘാതം വലുതായിരിക്കും. അതിനാല് യാത്ര ചെയ്യുന്നവരും മറ്റും മതിയായ ലിക്വിഡ് ക്യാഷ് ഉറപ്പാക്കുന്നത് നല്ലതാണ്.
നിലവിലെ സാഹചര്യത്തില് ജനുവരി 23 വെള്ളിയാഴ്ച എടിഎമ്മുകള് ഫില് ചെയ്താല് പിന്നീട് പണം നിറയ്ക്കുക ജനുവരി 28 ബുധനാഴ്ചയാകും. വാരാന്ത്യമായതിനാല് തന്നെ എടിഎമ്മുകള് കാലിയാകാനുള്ള സാധ്യത കൂടുതലാണ്. ഇത്തരമൊരു ഘട്ടത്തില്, പ്രത്യേകിച്ച് അവധി രാജ്യ വ്യാപകമായതിനാല് യുപിഐയില് വലിയ തിരക്ക് അനുഭവപ്പെട്ടേക്കാം. ഇതു ഓണ്ലൈന് പേയ്മെന്റുകളുടെ വിജയനിരക്കിനെ ബാധിക്കാം.
