Kerala Times Bureau
ഇന്ത്യൻ മെഡിക്കൽ അസോസിയേഷന്റെ (IMA), കേരള ഘടകം പൊതുജനങ്ങൾക്കായി കുറഞ്ഞ പ്രീമിയം നിരക്കിലുള്ള അപകട ഇൻഷുറൻസ് പദ്ധതി പ്രഖ്യാപിച്ചു. ‘രാസ്താ ആപതി കവച് – റോഡ് സേഫ്റ്റി ഇൻഷുറൻസ്’ എന്ന സ്കീമാണ് അവതരിപ്പിച്ചത്. ഇരുചക്ര വാഹനം, ഓട്ടോറിക്ഷ, ടാക്സി എന്നിവ ഓടിക്കുന്നവരെ ലക്ഷ്യമിട്ടുള്ളതാണ് ഈ പദ്ധതി. ഗുണഭോക്താവ് വാർഷിക പ്രീമിയമായി 250 രൂപ മാതം നൽകിയാൽ 2 ലക്ഷം രൂപയുടെ കവറേജാണ് ലഭിക്കുക.
സംസ്ഥാനത്ത് റോഡപകടങ്ങൾ കുറയ്ക്കാൻ ലക്ഷ്യമിട്ടുള്ള പദ്ധതിയാണ് അവതരിപ്പിച്ചത്. അപകടത്തിൽ പരിക്കു പറ്റിയാൽ പരമാവധി ചികിത്സാ ചിലവായി 2 ലക്ഷം രൂപ വരെ ലഭിക്കും. മരണമോ, സ്ഥിരമായ അംഗവൈകല്യമോ സംഭവിച്ചാലും രണ്ട് ലക്ഷം രൂപ ലഭിക്കും.
പദ്ധതി ഇങ്ങനെ…
സംസ്ഥാനത്തെ ഓരോ ജില്ലകളിലെയും 5 വീതം ഹോസ്പിറ്റലുകളെ ഈ പദ്ധതിയിൽ ഉൾപ്പെടുത്തി, ന്യൂ ഇന്ത്യ അഷ്വറൻസ് കമ്പനിയുമായി ചേർന്ന് നടപ്പാക്കുന്ന പദ്ധതിയാണിത്. കേരളത്തിലെ 116 ഐ.എം.എ ശാഖകളുടെയും സ്വകാര്യ ഹോസ്പിറ്റലുകളുടെയും പങ്കാളിത്തത്തോടെയാണ് പദ്ധതി നടപ്പാക്കുന്നത്.
18-70 വയസ്സ് പ്രായമുള്ളവർ ഒരു ലക്ഷം പേരെ ഈ സ്കീമിന്റെ ഭാഗമാക്കുകയാണ് ലക്ഷ്യം. ഈ പദ്ധതി വഴി റോഡപകടങ്ങളെക്കുറിച്ച് ബോധവൽക്കരണം നൽകുക എന്നതാണ് ലക്ഷ്യമെന്ന് ഐ.എം.എ ഡ്രൈവ് സേഫ് പ്രൊജക്ട് ചെയർമാൻ ഡോ. ജോസഫ് മാണി പറഞ്ഞു. ഒരാഴ്ച്ചയ്ക്കുള്ളിൽ ഈ പദ്ധതി തുടങ്ങാനാണ് ആലോചനയെന്നും അദ്ദേഹം അറിയിച്ചു.
എങ്ങനെ അംഗത്വം നേടാം?
ഓരോ ജില്ലകളിലും പങ്കാളികളാകുന്ന 5 ഹോസ്പിറ്റലുകൾ മുഖാന്തിരമാണ് സ്കീമിന്റെ ഭാഗമാകാൻ സാധിക്കുക. ഇവിടെ നിന്ന് ഇൻഷുറൻസ് സ്കീമിൽ ചേരാനുള്ള അപേക്ഷകൾ ലഭിക്കും. ഇത് പൂരിപ്പിച്ച് 250 രൂപ നൽകേണ്ടതാണ്. ഇൻഷുറൻസ് കമ്പനിയിൽ നിന്ന് ഗുണഭോക്താവിന്റെ ഇ-മെയിലിലേക്കും, വാട്സാപ്പിലേക്കും ഇൻഷുറൻസ് കാർഡ് അടക്കമുള്ള രേഖകൾ പിന്നീട് അയച്ചു നൽകും. ഈ ഹോസ്പിറ്റലുകളുടെ ലിസ്റ്റ് പിന്നീട് പുറത്തിറക്കും. പദ്ധതിയുടെ ഭാഗമല്ലാത്ത ഹോസ്പിറ്റലുകളിലും ചികിത്സ തേടാൻ സാധിക്കും. ഇത്തരത്തിലുണ്ടാകുന്ന ചിലവ് പിന്നീട് റീ ഇംബേഴ്സ്മെന്റായി നൽകും
ആകെ പ്രീമിയം തുക
ഈ പദ്ധതിയുടെ വാർഷിക പ്രീമിയം ആകെ 320 രൂപയാണ്. ഗുണഭോക്താവ് 250 രൂപയാണ് നൽകേണ്ടത്. ഐ.എം.എ 50 രൂപ, പങ്കാളിയാകുന്ന ഹോസ്പിറ്റൽ 20 രൂപ എന്നിങ്ങനെ വിഹിതം നൽകും. ഐ.എം.എയുടെ ചാരിറ്റി പ്രോഗ്രാമിൽ നിന്നാണ് പദ്ധതിക്ക് ആവശ്യമായ തുക കണ്ടെത്തുന്നത്. ആകെ 1 ലക്ഷം ആളുകൾക്കായി 50 ലക്ഷം രൂപയാണ് ചിലവഴിക്കുക.
