Kerala Times Bureau
Caution Digital Gold> ആഗോള, പ്രാദേശിക വിപണികളില് സ്വര്ണ്ണവില കുതിക്കുന്നതിനിടെ വീണ്ടും മുന്നറിയിപ്പുമായി ഇന്ത്യന് ഓഹരി വിപണി റെഗുലേറ്റര് സെക്യൂരിറ്റീസ് ആന്ഡ് എക്സ്ചേഞ്ച് ബോര്ഡ് ഓഫ് ഇന്ത്യ (സെബി). ഇന്ത്യയുടെ വര്ധിച്ചുവരുന്ന ഡിജിറ്റല് ഗോള്ഡ് ഭ്രമത്തിലാണ് സെബി ജാഗ്രത ആവശ്യപ്പെടുന്നത്. ഇതാദ്യമായല്ല സെബി ഇത്തരം മുന്നറിയിപ്പ് നല്കുന്നത്. ഡിജിറ്റല് ഗോള്ഡ് സെബി റെഗുലേറ്റഡ് അല്ലെന്നും, അതിനാല് യാതൊരുവിധി പരിരക്ഷയും ലിഭിക്കില്ലെന്നാണ് വിപണി റെഗുലേറ്ററുടെ മുന്നറിയിപ്പ്.
എന്താണ് ഡിജിറ്റല് ഗോള്ഡ്?
ഫിസിക്കല് സ്വര്ണ്ണ ഇടപാടുകള് കൂടാതെ സ്വര്ണ്ണം ഡിജിറ്റലായി സ്വന്തമാക്കാനുള്ള വഴിയാണ് ഡിജിറ്റല് ഗോള്ഡ്. സംഭരണ- വിതരണ ആശങ്കകളില്ലാതെ ഫ്രാക്ഷണല് എക്സ്പോഷര്, സുതാര്യമായ വിലനിര്ണ്ണയം, ഓണ്ലൈന് വാങ്ങലിന്റെ സൗകര്യം എന്നിവ ഡിജിറ്റല് ഗോള്ഡ് വാഗ്ദാനം ചെയ്യുന്നു. പണപ്പെരപ്പം, ഓഹരി വിപണി അസ്ഥിരത, ആഗോള വിപണികളിലെ മാന്ദ്യം, സ്വര്ണ്ണത്തിന്റെ കുതിപ്പ് എന്നിവ ഇന്ത്യയില് ഡിജിറ്റല് ഗോള്ഡ് ഭ്രമത്തിന് വഴിതുറന്നു. പോര്ട്ട്ഫോളിയോകളിലെ സ്വര്ണ്ണത്തിന്റെ സ്വാധീനം 15% കവിയരുതെന്ന് വിദഗ്ധര് പറയുന്നു. എന്നാല് ഇന്നു പലരുടെയും പോര്ട്ട്ഫോളിയോകളുടെ സിംഹഭാഗവും സ്വര്ണ്ണം കൊണ്ട് നിറഞ്ഞിരിക്കുന്നു.
സെബിയുടെ ജാഗ്രത നിര്ദേശം
ഡിജിറ്റല് ഗോള്ഡിലെ ഇന്ത്യക്കാരുടെ അമിത ഇടപെടലാണ് സെബിയെ മുന്നറിയിപ്പ് നല്കാന് പ്രേരിപ്പിച്ചത്. ഡിജിറ്റല് സ്വര്ണ്ണ പ്ലാറ്റ്ഫോമുകള് എങ്ങനെ പ്രവര്ത്തിക്കുന്നുവെന്നു കൂടി നിക്ഷേപകര് സൂക്ഷ്മമായി പരിശോധിക്കാന് റെഗുലേറ്റര് ആവശ്യപ്പെടുന്നു. ഡിജിറ്റല് സ്വര്ണ്ണ ഉല്പ്പന്നങ്ങളെ സെബി നിയന്ത്രിക്കുന്നില്ലെന്നും, അതിനാല് യാതൊരു സുരക്ഷിതത്വവും ഇല്ലെന്നും ഈ മുന്നറിയിപ്പില് പറയുന്നു.
നിങ്ങളുടെ ഡിജിറ്റല് സ്വര്ണ്ണത്തിന് ആനുപാതികമായ ഫിസിക്കല് ഗോള്ഡ് ഡിജിറ്റല് ഗോള്ഡ് കമ്പനികള് സൂക്ഷിക്കാത്ത പക്ഷം വലിയ പ്രശ്നങ്ങള് ഉണ്ടാകാമെന്നാണ് സെബി സൂചിപ്പിക്കുന്നത്. ഇത്തരം ഡിജിറ്റല് സ്വര്ണ്ണ കമ്പനികളിലെ സ്വതന്ത്ര ഓഡിറ്റുകളുടെയും, മേല്നോട്ടത്തിന്റെയും അഭാവം വലിയ റിസ്കിനെ സൂചി്പ്പിക്കുന്നു.
മുന്നറിയിപ്പ് എന്തുകൊണ്ട് പ്രധാനം?
സ്വര്ണ്ണത്തില് നിന്ന് നേട്ടമുണ്ടാക്കാന് നിരവധി സര്ക്കാര് അംഗീകൃത മാര്ഗങ്ങളുണ്ട്. സര്ക്കാരിന് വേണ്ടി ആര്ബിഐ പുറത്തിറക്കുന്ന സോവറിന് ഗോള്ഡ് ബോണ്ട് (എസ്ജിബി) മിന്നും പ്രകടനമാണ് കാഴ്ചവയ്ക്കുന്നത്. അല്ലെങ്കില് ഗോള്ഡ് ബോണ്ടുകള്, ഗോള്ഡ് ഇടിഎഫുകള്, ഗോള്ഡ് മ്യൂച്വല്ഫണ്ടുകള് എന്നിവ ഉപയോഗിക്കാം. ഏറ്റവും അങ്ങേയറ്റം ഫിസിക്കല് ഗോള്ഡ് (നാണയം, ബാര്) വാങ്ങാം. ഇവ നിങ്ങള്ക്ക് നിയമത്തിന്റെ പരിരക്ഷയും, ഉടമസ്ഥതയും ഉറപ്പുനല്കുന്നു. അതേസമയം ഡിജിറ്റല് ഗോള്ഡില് വ്യക്തമായ കസ്റ്റഡി വേര്തിരിവ്, സ്വതന്ത്ര ഓഡിറ്റുകള്, നടപ്പിലാക്കാവുന്ന വീണ്ടെടുക്കല് അവകാശങ്ങള് എന്നിവയൊന്നും തന്നെയില്ല. നിങ്ങള് വാങ്ങുന്ന സ്വര്ണ്ണം വാലറ്റുകളില് സൂക്ഷിക്കുന്നുവെന്നതിനു പോലും ഉറപ്പില്ല.
4 ചോദ്യങ്ങള്
ഡിജിറ്റല് സ്വര്ണ്ണം വാങ്ങും മുമ്പ് നിക്ഷേപകര് സ്വയം ചോദിക്കേണ്ട 4 ചോദ്യങ്ങളുണ്ടെന്ന് വിദഗ്ധര് പറയുന്നു. ഈ ചോദ്യങ്ങള്ക്കുള്ള വ്യക്തമായ ഉത്തരമാണ് പ്രധാനം.
- പ്ലാറ്റ്ഫോം ആരാണ് പ്രവര്ത്തിപ്പിക്കുന്നത്? അവര്ക്ക് നിയന്ത്രിത നിക്ഷേപ ഉല്പ്പന്നങ്ങളില് പരിചയമുണ്ടോ?
- ഗോള്ഡ് അലോക്കേഷന് പൂര്ണമാണോ? ഒരോ യൂണിറ്റിനും ആനുപാതികമായ ഭൗതിത സ്വര്ണ്ണം സൂക്ഷിക്കപ്പെടുന്നുണ്ടോ? അവയ്ക്ക് ഇന്ഷുറന്സ് പരിരക്ഷയുണ്ടോ?
- വോള്ട്ടിംഗ് പങ്കാളികളെ വെളിപ്പെടുത്തിയിട്ടുണ്ടോ? ഹോള്ഡിംഗുകള്ക്കു പതിവ് റിപ്പോര്ട്ടിംഗിനും, സ്വതന്ത്ര ഓഡിറ്റിംഗ് നടക്കുന്നുണ്ടോ?
- റിഡംപ്ഷന്, ഡെലിവറി, സ്റ്റോറേജ് നിബന്ധനകള് വ്യക്തമായി രേഖപ്പെടുത്തിയിട്ടുണ്ടോ? നടപ്പിലാക്കുന്നുണ്ടോ?
മുകളില് പറഞ്ഞ 4 ചോദ്യങ്ങള്ക്കും സുതാര്യമായി ഉത്തരം നല്കുന്ന പ്ലാറ്റ്ഫോമുകള് നിക്ഷേപകര്ക്ക് ആത്മവിശ്വസം പകരുന്നതാണ്. അപ്പോഴും അവിടെ നിയമത്തിന്റെ പരിരക്ഷയില്ലെന്നത് ഒരു വലിയ റിസ്ക് ആണ്. സ്വര്ണ്ണവില കുതിക്കുമ്പോള് വെറും കുതിപ്പ് മാത്രം കണ്ട് എടുത്തുചാടരുതെന്ന് വ്യക്തമാക്കുന്നതാണ് സെബിയുടെ മുന്നറിയിപ്പ്. നിങ്ങളുടെ നിക്ഷേപം വിവേകത്തോടെ ആകട്ടെ.
