Kerala Times Bureau
Bank Merger 2025 – പൊതുമേഖലാ ബാങ്ക് ലയനം വൈകാതെ നടപ്പാക്കാൻ ആലോചന. ലയനം സംബന്ധിച്ച് കേന്ദ്രധനമന്ത്രാലയം മുന്നോട്ടു വെച്ച നിർദ്ദേശം ഈ സാമ്പത്തിക വർഷം തന്നെ നടപ്പാക്കാൻ നടപടികൾ ആരംഭിച്ചേക്കും. റിപ്പോർട്ടുകൾ പ്രകാരം എസ്.ബി.ഐ, പഞ്ചാബ് നാഷണൽ ബാങ്ക്, കനറാ ബാങ്ക് എന്നീ 3 പൊതുമേഖലാ ബാങ്കുകളിലേക്ക് മറ്റ് ബാങ്കുകളെ കൂടി ലയിപ്പിക്കാനാണ് സാധ്യത.
ലയന സാധ്യതകൾ ഇപ്രകാരം…
ഇന്ത്യയിലെ ഏറ്റവും വലിയ വാണിജ്യ ബാങ്കാണ് എസ്.ബി.ഐ. ഇതിന് മുമ്പ് ബാങ്ക് ലയനം നടന്നപ്പോൾ സ്റ്റേറ്റ് ബാങ്ക് ഓഫ് ട്രാവൻകൂർ ഉൾപ്പെടെ എസ്.ബി.ഐയുടെ ഭാഗമായി മാറിയിരുന്നു. പുതിയ ലയനത്തിൽ ബാങ്ക് ഓഫ് മഹാരാഷ്ട്ര, പഞ്ചാബ് & സിന്ധ് ബാങ്ക്, യൂക്കോ ബാങ്ക് എന്നിവയെ എസ്.ബി.ഐയിൽ ലയിപ്പിക്കാനാണ് സാധ്യത. ഇന്ത്യൻ ഓവർസീസ്ബാങ്ക്, ബാങ്ക് ഓഫ് ബറോഡ, സെൻട്രൽ ബാങ്ക് ഓഫ് ഇന്ത്യ എന്നീ ബാങ്കുകളെ പഞ്ചാബ് നാഷണൽ ബാങ്കിലും, ഇന്ത്യൻ ബാങ്ക്, യൂണിയൻ ബാങ്ക്, ബാങ്ക് ഓഫ് ഇന്ത്യ എന്നിവയെ കനറാ ബാങ്കിനോടും ലയിപ്പിക്കാനാണ് ആലോചന. ഇത്തരത്തിൽ 3-4 ചെറിയ പൊതുമേഖലാ ബാങ്കുകളെ, താരതമ്യേന വലിയ ബാങ്കുകളുമായി ആദ്യഘട്ടത്തിൽ ലയിപ്പിക്കാനാണ് ആലോചന നടക്കുന്നത്. ഭാവിയിൽ ഈ 3 പൊതുമേഖലാ ബാങ്കുകളിൽ ചിലത് പരസ്പരം ലയിക്കാൻ പോലും സാധ്യതകളുണ്ടെന്ന് ഔദ്യോഗിക വൃത്തങ്ങൾ സൂചന നൽകി
എന്തു കൊണ്ട് ലയനം?
ആഗോള തലത്തിൽ സുസ്ഥിര സാമ്പത്തിക ശക്തിയായി ഇന്ത്യ വളരുകയാണ്. ഈ സാഹചര്യത്തിൽ ലോകത്തെ മുൻനിര 20 ബാങ്കുകളുടെ ഗണത്തിൽ ഇന്ത്യയിൽ നിന്നുള്ള ബാങ്കുകളെയും കൊണ്ടു വരിക എന്നതാണ് ലയനത്തിന്റെ പ്രധാന ഉദ്ദേശം. വായ്പാ വിതരണം അടക്കം വേഗത്തിലാക്കാനും ഇതിലൂടെ സാധിക്കും. 2021ൽ പ്രഖ്യാപിച്ച ന്യൂ പബ്ലിക് സെക്ടർ എന്റർപ്രൈസ് പോളിസി പ്രകാരമാണ് ബാങ്ക് ലയനം നടക്കു. ബാങ്കിങ് അടക്കമുള്ള തന്ത്രപ്രധാന മേഖലകളിൽ സർക്കാരിന്റെ സാന്നിദ്ധ്യം കുറയ്ക്കുക എന്നത് ഈ നയത്തിന്റെ ലക്ഷ്യമാണ്. ചെറിയ പൊതുമേഖലാ ബാങ്കുകൾക്ക് വൻകിട ലോണുകൾ ഉൾപ്പെട നൽകുന്നതിന് പരിമിതികളുണ്ട്. വൻകിട ബാങ്കുകളുമായി ലയിക്കുമ്പോൾ കാര്യക്ഷമത വർധിപ്പിക്കാനും, റിസ്ക് മാനേജ്മന്റ് ഫലപ്രദമായി നടപ്പാക്കാനും, ഭീമമായ ലോണുകൾ അനുവദിക്കാനുമെല്ലാം സാധിക്കും.
മുമ്പത്തെ ലയനം
2019-20 വർഷത്തിലാണ് ഇതിന് മുമ്പ് രാജ്യത്ത് ബാങ്ക് ലയനം നടന്നത്. 13 പൊതുമേഖലാ ബാങ്കുകൾ 5 എണ്ണമായി ലയിച്ചു. ഇത്തരത്തിൽ ആകെയുണ്ടായിരുന്ന പൊതുമേഖലാ ബാങ്കുകളുടെ എണ്ണം 27ൽ നിന്ന് 12 ആയി മാറി. ഈ ലയനം പൊതുമേഖലാ ബാങ്കുകളുടെ കരുത്ത് വർധിപ്പിച്ചു. നിലവിൽ ആസ്തിയുടെ കാര്യത്തിൽ എസ്.ബി.ഐ ആഗോള തലത്തിൽ 43ാം സ്ഥാനത്താണ്. ആകെ ആസ്തിയുടെ കാര്യത്തിൽ എസ്.ബി.ഐക്കൊപ്പം ആദ്യ 100 സ്ഥാനങ്ങളിൽ സ്വകാര്യ ബാങ്കായ എച്ച്.ഡി.എഫ്.സിയുമുണ്ട്. ഈ ലിസ്റ്റിൽ ആദ്യത്തെ 4 സ്ഥാനങ്ങളിലും ചൈനീസ് ബാങ്കുകളാണ്.
