മിഡിൽ ഈസ്റ്റിലെ തന്ത്രപ്രധാന എണ്ണ വ്യാപാര കേന്ദ്രമായ ഫുജൈറ തുറമുഖത്ത് ഡ്രോൺ ആക്രമണം

മിഡിൽ ഈസ്റ്റിലെ തന്ത്രപ്രധാന എണ്ണ വ്യാപാര കേന്ദ്രമായ ഫുജൈറ തുറമുഖത്ത് ഡ്രോൺ ആക്രമണം. ഡ്രോൺ പതിച്ചതിനെത്തുടർന്ന് സുരക്ഷാ മുൻകരുതലിന്റെ ഭാഗമായി തുറമുഖത്തെ ചില പ്രവർത്തനങ്ങൾ താൽക്കാലികമായി നിർത്തിവെച്ചു. എണ്ണ കയറ്റുമതിയെയും സംഭരണത്തെയും ഇത് ഭാഗികമായി ബാധിച്ചിട്ടുണ്ട്. ഡ്രോൺ അവശിഷ്ടങ്ങൾ വീണതിനെത്തുടർന്ന് ചില എണ്ണ സംഭരണ ടാങ്കുകൾക്കോ അനുബന്ധ സൗകര്യങ്ങൾക്കോ നാശനഷ്ടങ്ങൾ സംഭവിച്ചിട്ടുണ്ടോ എന്ന് അധികൃതർ പരിശോധിച്ചുവരികയാണ്. ആളപായമൊന്നും റിപ്പോർട്ട് ചെയ്തിട്ടില്ല.

യുണൈറ്റഡ് അറബ് എമിറേറ്റ്സിലെ ഒമാൻ ഉൾക്കടലിനോട് ചേർന്ന് കിടക്കുന്ന ഈ തുറമുഖം ലോകത്തിലെ തന്നെ ഏറ്റവും വലിയ ‘ബങ്കറിംഗ്’ (കപ്പലുകൾക്ക് ഇന്ധനം നൽകുന്ന കേന്ദ്രം) ഹബ്ബുകളിൽ ഒന്നാണ്. ഹോർമുസ് കടലിടുക്ക് വഴി പോകാതെ തന്നെ എണ്ണ പുറത്തെത്തിക്കാൻ കഴിയുന്നതിനാൽ ഇതിന് വലിയ തന്ത്രപ്രധാന പ്രാധാന്യമുണ്ട്.